As e dey Go
“Small small clubs no dey fear PSG again under Pochettino”-Mbappe
PSG Golden boy, Kylian Mbappe don come outside dey confess say; make I no lie o, for the past 2 years wey Mauricio Pochettino don dey handle PSG as coachie, small small clubs no dey fear us again. In fact any club wey wan play against us, even for French Ligue wey we suppose be Jagaban, you go see small clubs go come our home dey believe say dem go beat us kabakaba. Na my own observation be dat.
Although PSG win Ligue 1 last season with 15 points gap, we still dey hear say the club don ready to sack dem coachie, oga Pochettino because of poor performance. Upon say dem buy Messi join dem attack wey already get big players like Neymar, Mbappe and Di Maria, yet to win match dey hard dem. For defence, upon say dem sign defender like Hakimi still buy new keeper, Donnarumma come, yet dem still dey chop goals like hoodlum dey chop fufu.
Kylian Mbappe sign new 3 years contract wey make am the highest paid player in the world and also give am mouth to decide which coach and which players to hire or fire
Even UCL wey be PSG main target, wey dem don even dey lead 2-0 for the second half of the Round of 16 second leg against Real Madrid, yet dem show say na dem be the real bottling company when dem allow Real Madrid win dem 3-2 wey Karim Benzema score hat trick inside 17 minutes. Na all diswan make dem fans provoke sotay dem begin boo the club and big players like Messi and Neymar because dem believe say na dem dey collect highest salary yet na dem dey deliver lowest results on top pitch.
And now, Kylian Mbappe wey just sign new 650,000 pounds per week contract with PSG don agree say since Pochettino become dem coachie, nobody dey fear dem again and when before people dey see dem as lion, now dem dey see dem as Sallah ram wey anybody fit slaughter for chop. Mbappe also confirm say na UCL still be PSG target and na wetin him wish to deliver to the club over the next 3 years of him contract.
We don dey hear say inside the new contract wey PSG nak Kylian Mbappe, the 23 years old World Cup winner get mouth to decide which coachie make the club sign or sack. The same thing self with players because Mbappe go follow decide whether make the club sign any player or not.
Former Super Eagles skippo, John Obi Mikel don come outside dey shalaye say na almost everyday him dey chat Victor Osimhen dey remind am say make him no join any other club wey no be Chelsea because na club wey go favour am be that.
Osimhen wey be the current African footballer of the year dey currently play for Napoli but everybody believe say soon and very soon the Nigerian hit man go need to leave the club for something bigger.
And Mikel wey be former Chelsea player and legend after him carry them win Champions League believe say na him former club go fit Victor Osimhen pass. According to Mikel:
I know say many other clubs dey chook eyes for Osimhen matter. Clubs like PSG, Liverpool and even Manchester United dey toast am. But I believe say if you watch Chelsea now, our problem na say we no sabi put ball inside net. And the only work wey Osimhen sabi na to put ball into net. If that bobo come Chelsea, walai talai him go blow pass Timaya.
Mikel Obi also say na him dey act as Victor Osimhen agent for this parol. Him say Osimhen fit no be the most flashy player wey too skillful. But just like Haaland, Osimhen sabi put ball inside net and na wetin make am be big player be that.
Victor Osimhen na sharp shooter wey score 26 goals take help Napoli win Italian Serie A for the 2022/23 season. So far, the 25 years old striker don score 13 goals inside 21 appearances for Napoli this season including the hat trick wey him score against Sassuolo for Napoli last Serie A match.
Premier League legend, Alan Shearer don come outside dey draw ear give Marcus Rashford take dey warn am say, if you no take time and begin behave yourself, you go waste this your talent and your career. This one na after Marcus Rashford miss Manchester United FA Cup 4-2 win against Newport on Sunday.
According to Manchester United manager, Erik Ten Hag, Rashford miss the match because him call in sick on the Friday before the match say him no go fit make am. But reports show say Rashford been go one night club on that Wednesday go over enjoy and na since after that club naim wetin dey do am begin do am. Ten Hag say na internal matter so him go deal with am internally.
But this one don make many people dey wonder say which kind internal issue go make player no even turn up on the day of match? Alan Shearer also recall sometime last season when the same Marcus Rashford chop punishment after him arrive late for meeting before one of them league matches.
Alan Shearer
Na this one don make Shearer wey be Premier all-time top scorer de shake head with pity say Rashford just want to waste him talent. According to the legendary striker:
Marcus Rashford get big talent o, but the problem now be say him just want to waste am. Because we see the boy when him serious last season na. But this season so far, I no know wetin be him problem, whether him get family problem abi him girlfriend dey give am problem, or maybe na just village people, we need to help this boy and find out wetin be the problem otherwise him go just waste him career for nothing.
Alan Shearer also advice Rashford to find better manager and surround himself with wise people wey go dey remind am say if him continue like this and him career end, then him go truly regret him life and him wasted talent.
For now we dey wait to see how Erik Ten Hag wan take resolve Marcus Rashford internal problems.
As AFCON 2023 don enter knockout stage wey them don pair Nigeria to play Cameroon for the Round of 16 so, Super Eagles legend, Segun Odegbami don come outside like KingKong dey beat him chest say this Cameroon match go too easy for Nigeria because we go beat them like small pikin.
This one dey come after the AFCON wey dey happen inside Ivory Coast progress from the group stage enter knockout stages. This talk confuse many people because even for the group stage self, the Super Eagles no really impress as them manage to score only three goals in their three matches still finish second for the group.
On top of that the ball wey them dey play no even dey sweet for eyes make we say na that one we take hold body self. But on top of all of this, Mathematical Segun believe say Nigeria wey no dey give fans joy go easily beat and eliminate five-time AFCON champions, Cameroon from the competition.
Segun Odegbami believe say Cameroon no be Nigeria mate
According to Odegbami:
Na this Cameroon wey everybody dey fear naim go be our easiest match for this AFCON. Because all those their gidigbo football wey them like to dey play no go work for this new stadium wey we dey go. The former stadium wey them been dey play rough like farmland. But na this smooth pitch naim we go catch them take show them correct pepper.
Segun Odegbami also talk say the Super Eagles dey improve for them game because after drawing their first match them win the last two. According to the legend, na progressive that so no shaking for that Round of 16 match.
Nigeria go play Cameroon for their Round of 16 match wey go happen on Saturday by 9pm Nigeria time. Wetin you think about that match? Abeg tell us for comment section.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go2 years agoTransfer news: Oscar transfer to Flamengo don cast, Chelsea don agree to sign Casadei