Connect with us

As e dey Go

Transfer news: Oscar transfer to Flamengo don cast, Chelsea don agree to sign Casadei

Published

on

Transfer news: Oscar transfer to Flamengo don cast, Chelsea don agree to sign Casadei

We start dis morning transfer news with small vawulence because we don dey hear now say the transfer of former Chelsea midfielder, Oscar to Flamengo don breakdown because him current club, Shanghai SIPG don pull out of the deal for the 11th hour.

According to the tory, Oscar don already agree to join Flamengo inside Brazil. The bobo don already sign the contract even take pictures with Flamengo jersey, Flamengo oga dem don sign the contract, but na when dem carry contract give Shanghai SIPG to sign na there wahala start.

Transfer news: Oscar transfer to Flamengo don cast, Chelsea don agree to sign Casadei

Oscar don even dey pose for picture with Flamengo jersey before him current club cast the whole thing

Shanghai SIPG say dem never agree anything concrete with Flamengo because wetin dem do na verbal agreement and as far as dem concern, verbal agreement no be agreement. Therefore dem cancel the whole deal and as e be now, Oscar don return back to China to continue with Shanghai SIPG.

Chelsea don agree to sign Cesare Casadei from Inter

Chelsea don finally agree to sign Cesare Casadei from Inter Milan on top 6 years contract. Casadei na 19 years old Italian prospect wey many people dey rate well well say the bobo good. Na diswan don make Chelsea count 15 million euros take sign the bobo so.

Transfer news: Ronaldo don finally agree to stay Manchester United, Arthur Okonkwo don leave Arsenal

Cesare Casadei na 19 years old central midfielder wey many people see as hot property

Other clubs like Nice for France and Sassuolo inside Italy also been dey toast the boy but e be like Chelsea him finally agree to follow go house. By signing young midfielders like Carney Chukwuemeka and Cesare Casadei join the likes of Connor Gallagher, e be like Chelsea dey plan for the long term.

Tanguy Ndombele go join Napoli on loan

For the last tory inside our transfer news, Tottenham don agree to allow midfielder, Tanguy Ndombele make him join Napoli on loan till the end of the season. According to the contract wey we see, na 1 million euros Napoli go pay as loan fee and dem also get option to buy the bobo with 30 million euros if dem gbadun him style.

Transfer news: Oscar transfer to Flamengo don cast, Chelsea don agree to sign Casadei

Ndombele na Tottenham record signing but na problem with consistency and dedication make am land inside our transfer news so because dem wan release am so just 3 years after dem sign am

Na Mourinho sign Ndombele for Tottenham for club record transfer fee of 72 million euros plus add on. Although the bobo start well, even Mourinho wey sign am later begin get problem with him dedication. The problem continue with other coachies until now wey Antonio Conte don decide to move am on.

As e dey Go

Mudryk dey learn work where Saka dey – Steven Gerrard

Published

on

Mudryk dey learn work where Saka dey - Steven Gerrard

After Mykhailo Mudryk fumble upandan during Ukraine friendly match with England on Sunday, Premier League legend, Steven Gerrard don come outside dey shake head say this guy still get very long way to go.

Steven-G dey yan this one after the Chelsea winger fail to track down Bukayo Saka sotay the bros even fall yakata before Saka locate Harry Kane to score England first goal for the 2-0 beating.

Na the same Saka score the second goal after making one sweet drive before unleashing one wucked long-rage shot inside net wey make Mudryk Ukraine teammate, Oleksandr Zinchenko confess say na Saka be the best player for Premier League.

Mudryk believe say Chelsea go first Arsenal win EPL and UCL that’s why him sign for them

Chelsea splash hooge money take hijack Mykhailo Mudryk from Arsenal nose

Na the same performance make Steven Gerrard come outside use sliding tackle take dey fire Mudryk say if na like this him dey play, that means him journey still long and him get a lot to learn. According to the Liverpool legend:

”Walai talai if na me be Ukraine coachie, that igbakugba wey Mudryk play go annoy me well well. What a disappointing display. With the speed and power wey him get, yet Saka chance am like paper weight. The guy na learner and I hope say him learn quick.”

Na Arsenal been wan sign Mykhailo Mudryk for January transfer window until Chelsea rush go hijack the bobo from the back door on top £88 million contract. But the bobo never see him period since him arrive Stamford Bridge with 0 goals and 1 assist to him name.

Continue Reading

As e dey Go

We buy ticket for Super Eagles to give us joy, instead them increase our anger – fans

Published

on

We buy ticket for Super Eagles to give us joy, instead them increase our anger - fans

After the Super Eagles of Nigeria lose 1-0 to Guinea Bissau last night for Abuja, fans don dey react with provocation say in the midst of all the problems and suffer wey them dey face inside the country, national team no fit give them small joy.

Nigeria host Guinea Bissau for the third match of their Group A AFCON qualifying group. Na Naija been dey top the group with 6 points before the match after beating both Sierra Leone 2-1 and São Tomé 10-0.

Na wetin make many fans believe say the Super Eagles go sweep the group stage clean and no be ordinary Guinea Bissau go stop them for Abuja. But na when match start we begin see am say this Bissau people no come Abuja come help INEC count ballot.

The Super Eagles start well but immediately Mama Balde score the only goal of the match for the 29th minute, e just be like say dem use pin take deflate all Naija players morale. From there na only igbakugba them just dey play until 90 minutes over.

We buy ticket for Super Eagles to give us joy, instead them increase our anger - fans

Guinea Bissau score the only goal of the match

Na wetin make many fans don dey react about the match with many of them insisting say the Super Eagles fall their hand kpatakpata. According to one fan, Mudasiru, him carry 2k wey him for take cook pot of soup go pay for match ticket only to return with anger.

”I buy ticket 2,000 to watch Super Eagles beat Guinea Bissau and make me happy, but instead na anger follow me reach house. Na the same thing them do me against Ghana. I no sure say I go watch Super Eagles match again.”

Another fan, Jerry, say make we no dey whyne ourself again, Naija no get national team because foreign-based players dey feel like Alhaji and coachie no dey ever invite home-based players wey still dey hungry pass lion.

”Peseiro suppose know by now say the earlier him begin integrate home-based players for the team the better for us. Home base players still get hunger for success unlike those foreign based players wey believe say them don arrive.”

As for another fan, Ogugua say the problem na that Abuja stadium because that stadium na neutral ground. According to am, the stadium always scanty whenever Super Eagles dey play match and the fans no dey connect with the players. So him dey recommend Uyo stadium.

Super Eagles currently dey 2nd for the Group A qualifying table with 6 points. Na Guinea Bissau dey top the group now with 7 points.

Continue Reading

As e dey Go

Arsenal best physio follow Partey go Ghana to prevent injury during international break

Published

on

Arsenal best doctor follow Partey to Ghana to prevent injury during international break

As Thomas Partey don travel to Ghana to play for him national team during international break, we don dey hear now say Arsenal send their best number 1 physiotherapist with am to make sure say the bobo no return with any injury.

Thomas Partey na one of the most important players for this Arsenal team wey dey hustle to win their first Premier League title in nearly 20 years. Unfortunately, the former Atletico Madrid man na also the most injury prone player.

And whenever him sustain injury, the team dey suffer because him no get solid replacement. Elneny wey dey replace am before sustain season-long injury since January. Arsenal try to replace the replacement with Moises Caicedo but Brighton no gree.

In the end The Gunners settle for Jorginho from Chelsea and although him dey try him best, you go just know say if no be Panadol e no fit be like Panadol. This is why Arsenal dey try protect their biggest asset by sending their best physio to dey monitor am.

Arsenal best doctor follow Partey to Ghana to prevent injury during international break

Thomas Partey dey with Ghana for international break

Ghana go host Angola for them Group E AFCON Qualifiers today before travelling to Angola for the second leg on Monday. Last time wey Partey go International break for September 2022, the bobo carry injury come back.

But Arsenal wey dey top table with 5 points difference no fit risk that kind injury now. Na just 10 matches remain and those matches include Liverpool, Newcastle and Manchester City away, then Chelsea for Emirates. Mikel Arteta boys need Partey now.

Continue Reading

Trending