As e dey Go
Even me wey be Togo best player, I no behave like Onana – Emmanuel Adebayor
Former Togolese big striker, Emmanuel Adebayor don come outside dey blast Cameroon goalie, Andre Onana for joining them national team for the African Cup of Nations (AFCON) on the day wey them get their first match. Adebayor say wetin Onana do na big disrespect to the country.
Una remember say na on Monday wey Cameroon dey play their first match for AFCON naim Andre Onana finally join up with the Cameroonian national team for Ivory Coast. But that one no be problem because we don hear before say na agreement wey Cameroon get with Onana club, Manchester United be that.
The problem be say Andre Onana wey arrive on Monday still dey expect to start the match that same day, less than 24 hours after him last match for Manchester United against Tottenham, on top jet lag. But Cameroon coachie, Rigobert Song no gree start am say make him rest small, but that decision no sweet Onana at all.
Emmanuel Adebayor no like Andre Onana behaviour at all
Na this one don make Adebayor wey be Togo all-time highest goal scorer with 32 goals inside 87 matches don come outside dey blast Onana say, you should be ashamed of yourself. According to the former Arsenal and Manchester City striker:
Onana no respect Cameroon at all. Because if you respect your country, you no go dey come competition on the day wey your country get first match. No be you be the first player to play AFCON, during my time na me be the biggest player for Togo, but I no ever behave like this because na me dey always first come camp. Na so big player dey behave.
Cameroon later come from 1-0 down to draw 10-man Guinea 1-1 for them first match. Now them go face defending champions, Senegal for them second match on Friday and many people expect to see Andre Onana for post because that match na very important match wey Cameroon no need to lose.
Former Super Eagles skippo, John Obi Mikel don come outside dey shalaye say na almost everyday him dey chat Victor Osimhen dey remind am say make him no join any other club wey no be Chelsea because na club wey go favour am be that.
Osimhen wey be the current African footballer of the year dey currently play for Napoli but everybody believe say soon and very soon the Nigerian hit man go need to leave the club for something bigger.
And Mikel wey be former Chelsea player and legend after him carry them win Champions League believe say na him former club go fit Victor Osimhen pass. According to Mikel:
I know say many other clubs dey chook eyes for Osimhen matter. Clubs like PSG, Liverpool and even Manchester United dey toast am. But I believe say if you watch Chelsea now, our problem na say we no sabi put ball inside net. And the only work wey Osimhen sabi na to put ball into net. If that bobo come Chelsea, walai talai him go blow pass Timaya.
Mikel Obi also say na him dey act as Victor Osimhen agent for this parol. Him say Osimhen fit no be the most flashy player wey too skillful. But just like Haaland, Osimhen sabi put ball inside net and na wetin make am be big player be that.
Victor Osimhen na sharp shooter wey score 26 goals take help Napoli win Italian Serie A for the 2022/23 season. So far, the 25 years old striker don score 13 goals inside 21 appearances for Napoli this season including the hat trick wey him score against Sassuolo for Napoli last Serie A match.
Premier League legend, Alan Shearer don come outside dey draw ear give Marcus Rashford take dey warn am say, if you no take time and begin behave yourself, you go waste this your talent and your career. This one na after Marcus Rashford miss Manchester United FA Cup 4-2 win against Newport on Sunday.
According to Manchester United manager, Erik Ten Hag, Rashford miss the match because him call in sick on the Friday before the match say him no go fit make am. But reports show say Rashford been go one night club on that Wednesday go over enjoy and na since after that club naim wetin dey do am begin do am. Ten Hag say na internal matter so him go deal with am internally.
But this one don make many people dey wonder say which kind internal issue go make player no even turn up on the day of match? Alan Shearer also recall sometime last season when the same Marcus Rashford chop punishment after him arrive late for meeting before one of them league matches.
Alan Shearer
Na this one don make Shearer wey be Premier all-time top scorer de shake head with pity say Rashford just want to waste him talent. According to the legendary striker:
Marcus Rashford get big talent o, but the problem now be say him just want to waste am. Because we see the boy when him serious last season na. But this season so far, I no know wetin be him problem, whether him get family problem abi him girlfriend dey give am problem, or maybe na just village people, we need to help this boy and find out wetin be the problem otherwise him go just waste him career for nothing.
Alan Shearer also advice Rashford to find better manager and surround himself with wise people wey go dey remind am say if him continue like this and him career end, then him go truly regret him life and him wasted talent.
For now we dey wait to see how Erik Ten Hag wan take resolve Marcus Rashford internal problems.
As AFCON 2023 don enter knockout stage wey them don pair Nigeria to play Cameroon for the Round of 16 so, Super Eagles legend, Segun Odegbami don come outside like KingKong dey beat him chest say this Cameroon match go too easy for Nigeria because we go beat them like small pikin.
This one dey come after the AFCON wey dey happen inside Ivory Coast progress from the group stage enter knockout stages. This talk confuse many people because even for the group stage self, the Super Eagles no really impress as them manage to score only three goals in their three matches still finish second for the group.
On top of that the ball wey them dey play no even dey sweet for eyes make we say na that one we take hold body self. But on top of all of this, Mathematical Segun believe say Nigeria wey no dey give fans joy go easily beat and eliminate five-time AFCON champions, Cameroon from the competition.
Segun Odegbami believe say Cameroon no be Nigeria mate
According to Odegbami:
Na this Cameroon wey everybody dey fear naim go be our easiest match for this AFCON. Because all those their gidigbo football wey them like to dey play no go work for this new stadium wey we dey go. The former stadium wey them been dey play rough like farmland. But na this smooth pitch naim we go catch them take show them correct pepper.
Segun Odegbami also talk say the Super Eagles dey improve for them game because after drawing their first match them win the last two. According to the legend, na progressive that so no shaking for that Round of 16 match.
Nigeria go play Cameroon for their Round of 16 match wey go happen on Saturday by 9pm Nigeria time. Wetin you think about that match? Abeg tell us for comment section.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans