For transfer news today, we don dey hear now say Manchester United don ready to increase dem bid for Ajax attacker, Antony to 80 million pounds. Manchester United don first drop 68 million pounds but Ajax reject am say if na crayfish United wan buy, dem better go find am for Oyingbo market.

Antony na one of oga Erik Ten Hag key transfer target dis transfer window and United don dey pursue the bobo since transfer start. Antony himsef wan join the Old Trafford club and him don tell the club say him mind no dey the club again so make dem sell am.

Antony na 22 years old Brazilian winger wey learn work for São Paulo before joining Ajax for 2020 on top 13 million pounds contract. Since then Antony don score 18 goals for 57 league matches. Him also follow for the Brazil U-23 team wey win Gold for Tokyo 2020 Olympics.

Leicester don reduce Tielemans bride price to about £20m

Leicester don finally reduce hand for Tielemans bride price say dem go collect £20m last price

We don dey hear now say Leicester don ready to reduce hand for the money wey dem dey ask for Youri Tielemans so dat the bobo go fit find husband before him time expire. We hear say Leicester don ready to collect last price of 20 million pounds instead of the 38 million wey dem been dey ask for.

According to the tory, the reason why dem go down low na because the bobo remaining contract no reach 1 year again so e better make dem sell am now for around 20 million pass make dem let am waka for free. Arsenal don dey pursue dis guy since and now na dem opportunity to get am for cheap.

Hudson-Odoi fit join Bayer Leverkusen on loan

We don dey hear now say Chelsea winger, Callum Hudson-Odoi don dey warm up to join Bayer Leverkusen on top loan contract. Hudson-Odoi na one of the wingers like Pulisic and Ziyech wey no too see dem period under Chelsea coachie, oga Thomas Tuchel.

Hudson-Odoi reject 2 EPL clubs to fit join Leverkusen and Chelsea don already wan sign Anthony Gordon to replace am

Hudson-Odoi problem start when him get injury for the month of March wey make am miss the rest of the season. But the bobo return when him mates dem go house for holiday, and the guy use dat period take dey train alone dey build him fitness. But e be like all that wan no dey enough because na loan him go end up.

For transfer news dis morning, we don dey hear now say Chelsea don dey plan to sign Rafael Leao from AC Milan. Chelsea really need attacking players because to score don become big problem for dem. And after dem return Romelu Lukaku and Timo Werner back to where dem come from, none of dem front 3 don score dis season.

Rafael Leao na Portuguese attacker wey get both speed and power wey don make many people talk say EPL football fit favour am. The only problem for dis Leao transfer now be say the bobo contract carry release clause of 150 million euros and we never sure if Chelsea go gree pay da kind money. Chelsea also dey target former Arsenal striker, Pierre-Emerick Aubameyang.

Manchester United wan sign new Kevin Trapp

We don dey hear now say Manchester United don drop marriage proposal give Eintracht Frankfurt to take sign their keeper, Kevin Trapp comot from the club straight to Old Trafford. After the kind akpere performance wey De Gea perform against Brentford, maybe na da wan make the club begin reading new keeper so.

Kevin Trapp wey also be PSG Number 1 before, win Europa League with Frankfurt last season

Kevin Trapp na 32 years old experienced defender wey even follow Germany win FIFA Confederations Cup for 2017. But the former PSG keeper also win many local trophies for Ligue 1 before winning the biggest one last season when him save Aaron Ramsey penarity to help Frankfurt beat Rangers and win the Europa League. We never sure how much United dey price the guy sha.

Ziyech dey wait to join Ajax from Chelsea

We don dey hear now say Chelsea winger, Hakim Ziyech don dey warm up to return to him former club, Ajax, after two years wey him join Chelsea from the same Ajax. According to the tory, na since May naim Chelsea don dey find way to offload the guy and now e be like say e finally don wan happen.

Hakim Ziyech wan return back to Ajax

Na for 2020 naim Hakim Ziyech wey dey 29 years old join Chelsea from Ajax. Although him win UCL for him first season, e be like things no later go well between him and Thomas Tuchel wey make dem wan sell am now. Ajax jus dey wait now make Antony finally join Manchester United before dem go finally submit proposal to bring the bobo back to Eredivisie.

For transfer news dis morning, we don dey hear now say Chelsea don point dem hand straight to Harry Maguire say dat Manchester United skippo wey everybody dey treat like leper, na dat guy naim dem need to complete dem defensive formation.

Na Manchester United start everything after dem go dey price Chelsea winger, Christian Pulisic say dem need the bobo to come push attack for dem. But now Chelsea don reply dem say, if una want Pulisic, no wahala. But in exchange, una go give us Harry Maguire make we use am take balance the equation.

Harry Maguire wey be United skippo don dey under heavy probation since last season and many United fans go even dey pray make him go. But e go hard to sell Maguire now because wetin make 2 UCL clubs, Barcelona and now Chelsea don try to sign am dis transfer window, da means be like the bobo still get something to offer.

Manchester United don sign Casemiro

Manchester United don complete the signing of Casemiro from Real Madrid on top total package of 70 million pounds. We hear say the contract go last for 4 years and Casemiro salary go make am one of the highest-paid players for United and possibly for the whole EPL.

Manchester United don sign Casemiro from Real Madrid

Casemiro na 30 years old solid defensive midfielder wey don win 5 UCL title with Real Madrid. Unlike other United signings, dis Casemiro own happen quickly and with the kind midfield problems wey United dey get now, Casemiro experience and winning mentality suppose for help dem out for dat department.

Eric Bailly to join Marseille on loan

We don dey hear now say Manchester United Ivory Coast defender, Eric Bailly don dey warm up to join Olympique Marseille on top loan contract for the season. We hear say dis loan contract go also include option to buy.

Eric Bailly finally no find him bearing for Manchester United and now dem wan carry am go France on loan

Eric Bailly a one defender wey many people believe say him solid well well and dem need to give am chance to prove himself for Manchester United. Unfortunately, anytime wey dem give am opportunity him must commit one calamity or the other. Na diswan make dem wan move the guy on make e find club wey go favour am.