After collecting dat humiliating 3-0 flogging inside Old Trafford, Manchester United coachie, oga Erik ten Hag don come outside dey announce to the world say him boys play very well regardless of wetin the score line talk.

Ten Hag defensive formation look like e get comma because na both Harry Maguire and Johnny Evans start while Raphael Varane dey bench. Also the coachie start Victor Lindelof for left back when Regulion wey be natural left back dey bench.

VAR award City penarity after Rasmus Hojlund drag Rodri down inside 18 yard box. Erling Haaland use dat penarity take rediscover him Premier League scoring form to make am 1-0. Andre Onana make many excellent saves for dat match but him no fit deny Haaland second goal with one powerful header to make am 2-0.

Erling Haaland destroy Erik ten Hag boys

The third goal come after Onana make another excellent save to deny Rodri, only for the ball to come meet Haaland wey square the ball back for Phil Fodden to complete am 3-0. But Erik ten Hag don come outside dey defend him boys performance say dem play well. According to am:

If you watch the first half you go see am say nothing City take pass us. We jam dem head to head, if no be dat penarity maybe e for be first half draw. Even with the penarity sef, we too create chances wey we just no convert. See dat McTominay own, on a good day goal be dat ball. So yesterday na just bad day for market for us.

Manchester United don lose five out of 10 league matches so far dis season. Out of those five losses, three na for Old Trafford. And as e be now, dem dey 8th position on top table, eight points behind the Top 4 and 11 points behind Tottenham wey dey top league.

We don dey hear now say Senegal striker, Sadio Mane don buy one football club inside France wey dem dey call Bourges Foot 18. The club dey play for the fourth division of French League.

According to the tory, e don tay wey Sadio Mane don dey find club wey him go buy but e no work out until now. And the former Liverpool winger no be stranger for Bourges Foot as him don dey donate money give the club right from time to help dem pay salary and buy players for more than 3 years.

Na all dis good-good things wey him dey do make am become paddy with the owner of the club as well as the mayor of the town wey the club locate. And as e be now, the club president don kuku advise am to close eyes buy the club so dat him go begin control the club fully.

Mane currently dey play for Al-Nassr inside Saudi

Bourges Foot 18 currently dey second to the last for Group B of French fourth division. But the club been dey perform better pass like dis, in fact the club don play for Ligue 2 before wey be the second division of French league. But since then things no go well with dem wey don push dem enter Division 4 so.

But as e be now, the club president and Mayor of the town believe say the way forward na to sell the club give Sadio Mane. And Mane sef wey start him football career for France, don tell dem say him plan na to reorganize the club and return am back to dem former glory.

We don see footballers wey retire to pursue different kind opportunity like teaching, coaching and even driving taxi. But former Super Falcons striker, Desire Oparanozie don talk say the way she dey see am, e be like na to begin fight Mixed Martial Arts inside UFC naim be her next calling.

Oparanozie talk diswan during one event wey dem organize to celebrate her retirement from football at the age of 29. Although e be like say she use play play take dey talk am say she wan join UFC, but everybody know say na from play play naim seriousness take dey start.

Oparanozie no go be the first footballer to quit football begin fight because Manchester United legend, Rio Ferdinand been join boxing immediately after retiring from football. But after e collect beating like agbero for bus stop, Baba quickly retire from boxing too.

Desire Oparanozie no go also be the first footballer to leave football join another sport because Chelsea legend, Petr Cech retire from football keeper work go begin keep for ice hockey. Gareth Bale also retire from Real Madrid go begin play golf where him don even begin win titles there.

Desire Oparanozie go join Adesanya and Usman for UFC

If she finally decide to join UFC, Desire go dey in the company of many elite Nigerian athletes. Former champions like Kamaru Usman and Israel Adesanya dey there. Other Naija fighters like Sodiq Yusuff, Chidi Njokuani and Kennedy Nzechukwu also dey there.

But if you check all dis people well you go see am say none of dem be woman. So e no go bad if Desire Oparanozie become the first Naija woman to fight and maybe win belt for UFC. The problem be say, statistically, fighters wey leave other professional sports like American football etc, no dey too do well when dem join UFC. Maybe na our Naija sister go break the record.

Oparanozie na one of the most prolific strikers to ever play for Super Falcons. The babe help the Naija win 4 WAFCON trophies while playing inside 4 Women World Cup for Naija. She score 22 goals in 35 matches for Super Falcons.