As e dey Hot
Folarin Balogun: Americans dey beg Naija Blood to play for dem instead
Them say the rejected stone fit one day become the oga kpatakpata of all the stones and right now, Folarin Balogun wey be reject for Arsenal don dey shine for France sotay Americans don dey beg for the Naija blood to play for USA instead of Nigeria or even England.
Folarin Balogun na Arsenal player wey start to dey shine from the club academy. But when time reach for am to break into the first team, e come be like say na then village people open him file and anytime him enter pitch, e go just be like say na igbakugba him dey play.
Even after Arsenal nak am new improved contract, Balogun game still no improve and na wetin make Arsenal coachie, oga Mikel Arteta kuku decide on forward him matter to France by sending am on loan to Reims.
Na for Reims Balogun star begin shine as the boy just dey bang goals anyhow sotay him don score 10 goals this season to make sure say na only 2 goals separate him and Kylian Mbappe wey be Ligue 1 top scorer.
But na the two goals wey him score last night against Rennes including one wucked volley naim burst Americans head make dem dey beg make Folarin Balogun abandon him ancestral country wey be Naija, abandon him adopted country wey be England, and play for them instead.
Folarin Balogun don play age grade football for England but him don confess say him for like play for Naija if Naija call am
According to the American fans wey dey beg them FA to invite the boy sharply now wey nobody else dey on top him matter, one of USA biggest problem na that Number 9 position wey Balogun dey play because the full country never fit produce striker wey go fill in that position.
Therefore, make the country do everything to make am choose USA, if na to dash am hooge money, or to build house for him mama and papa, or even nak am lifetime insurance, anything wey them fit do to make am declare for USA, make them run am.
Folarin Balogun papa and mama come from Nigeria. But them born am for New York inside America before them carry am go England when him dey just 2 years old. Na for England him grow up and even play Under-21 there. But him don confess say him go like play for Naija if Super Eagles call am.
As e dey Go
Guinea player wey accuse him coachie of stealing jersey wey Vinicius dash am go miss AFCON
Guinea midfielder, Morlaye Sylla name nor dey the list of players wey go play this CAF African Cup of Nations wey go take place for Ivory Coast next month after him accuse Guinea national team coach, Kabba Diawara of stealing jersey wey Vinicius Junior give am when them play friendly match with Brazil for June this year.
Wahala start when Sylla find out sey jersey wey him swap with Vini Jnr wey him carry enter dressing room dey miss. Him start dey hala sey how jersey wey him carry enter dressing room go just borrow leg like that. Him start dey search everywhere.
Guinea football coachie
After him search everywhere, him sey him go search all the players for the dressing room sey nah them steal am. Then later, him start to dey accuse their team coach, Kabba Diawara, sey nah him steal the jersey.
Nah this one make the coach and Guinea FA sey him nor go play for them again unless him apologize. But Sylla nor gree apologize. Him sey him dey on him right as him expect Guinea FA to focus more on who thief him original jersey wey nor be okrika.
Guinea go start their AFCON on 15th January when them go play Cameroon before them play Gambia and then defending champions, Senegal.
Barcelona and Manchester City legend, Yaya Toure, don use microphone like hype man declare say more black coaches suppose dey professional football pass as e dey.
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
What Guardiola and Mourinho can do, we can do put jara
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
Lukaku matter don turn spiritual
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans