As e dey Hot
Referee wey no give Wolves penarity against Man United don chop suspension
As e dey hot, that referee wey officiate Manchester United vs Wolves match last night no go officiate any Premier League match next week. This na because the ref, oga Simon Hooper no award one clean and clear penarity to Wolves even after going to look the VAR screen by himself during the match.
Una remember say United dey one goal down when Wolves begin press dem neck dey hustle for equalizer. Na when Wolves cross in one sweet ball naim United keeper, Andre Onana rush come outside, miss the ball totally before hitting Wolves player down inside 18.
VAR official, Michael Salisbury no even call the ref to come check the matter for VAR tv and in the end, the ref no award the penarity. The VAR official sef don kuku follow collect the suspension because both him assistant, Richard West dem go join the ref watch all the matches from home next week.
Meanwhile, Wolves coachie, Garry O’Neill say the oga kpatakpata of referee dem inside England, Jon Moss, don apologize to am for the penarity wey dem nor give dem for added time for their Premier League opening match against Manchester United.
VAR suppose help wen ref dey confused
Wolves go house empty hand yesterday night as dem fail to pick even one point despite the many chances wey dem get to score for Old Trafford. Wolves play Man U sotey people begin wonder whether na Wolves dey home. The only thing wey dem fail to do nah to put ball for net.
Manchester United win the match 1-0 after Raphael Varame nod Wan Bisaka looping cross inside empty net. But nah for added time after 90 minutes nah in the match tie wrapper tie gele as Onana mistime Pedro Neto cross go hit Sasa Kalajdzic for head wey make the boob start to dey see double. VAR check the matter wella but decide sey nor be wetin oyinbo dey call clear and obvious error.
After the VAR decision, Simon Hooper wey be the referee rush dey go touchline wey make everybody for the stadium think sey him wan go look wetin really happen for the VAR big TV. But him end up with yellow card for Garry O’Neill as the bobo almost kolo because of the decision. Now, him don sey:
‘Referee oga, Jon Moss, don tell me sorry for the penarity wey the referee nor give us. I nor dey sey nah ojoro o but I believe sey the crowd for Old Trafford and because nah Man U fit make ref dey blow empty. As Jon Moss don apologize, I don calm down small but wetin still dey pain me be sey the penarity too clear for everybody wey know ball to know sey nah clear penarity but wetin I go do? ‘.
Wolves next match nah for their home against Bournemouth while Manchester United dey travel go London go jam Tottenham Hotspur. Wolves go dey hope to get at least one point.
As e dey Go
Guinea player wey accuse him coachie of stealing jersey wey Vinicius dash am go miss AFCON
Guinea midfielder, Morlaye Sylla name nor dey the list of players wey go play this CAF African Cup of Nations wey go take place for Ivory Coast next month after him accuse Guinea national team coach, Kabba Diawara of stealing jersey wey Vinicius Junior give am when them play friendly match with Brazil for June this year.
Wahala start when Sylla find out sey jersey wey him swap with Vini Jnr wey him carry enter dressing room dey miss. Him start dey hala sey how jersey wey him carry enter dressing room go just borrow leg like that. Him start dey search everywhere.
Guinea football coachie
After him search everywhere, him sey him go search all the players for the dressing room sey nah them steal am. Then later, him start to dey accuse their team coach, Kabba Diawara, sey nah him steal the jersey.
Nah this one make the coach and Guinea FA sey him nor go play for them again unless him apologize. But Sylla nor gree apologize. Him sey him dey on him right as him expect Guinea FA to focus more on who thief him original jersey wey nor be okrika.
Guinea go start their AFCON on 15th January when them go play Cameroon before them play Gambia and then defending champions, Senegal.
Barcelona and Manchester City legend, Yaya Toure, don use microphone like hype man declare say more black coaches suppose dey professional football pass as e dey.
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
What Guardiola and Mourinho can do, we can do put jara
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
Lukaku matter don turn spiritual
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans