As e dey Hot
FA dey investigate Arsenal for excessive celebration against Bournemouth
As Arsenal dey hustle to win dem first Premier League title in nearly 20 years, e be like say dem no even fit celebrate winning match without getting into trouble as FA don open investigation for their head after dem come from 2 goals down to win Bournemouth 3-2 on Saturday.
Arsenal concede the second-fastest goal in EPL history when Naija blood, Philip Anyanwu Billing score for Bournemouth just 9 seconds after match start. The club wey dey 19th for EPL table continue dey press Arsenal neck when Marcos Senesi use one powerful header make am 2-0 for second half.
But Arsenal begin show championship spirit when Thomas Partey fire in the first goal from close range before Ben White equalise with another powerful rifle.
But na Reiss Nelson last-minute winner naim scatter everywhere as the substitute use one left foot shot take tear Bournemouth net and complete the comeback.
As Nelson score the goal naim Emirates scatter sotay substitutes, fans and even some coaching officials run enter pitch to celebrate with the boys. And na dat celebration naim FA carry for mind so especially the coaching staff them.
According to FA rules, coachies and players wey dey for the technical area must behave responsibly at all times. So even if players and fans dey misbehave and do anyhow, them expect the coaching crew to act like senior men and no join them for the misbehaving.
Although Mikel Arteta no join them celebrate enter pitch, some Arsenal coachies and substitutes rush enter pitch go celebrate that goal when match clearly never end. Na wetin FA dey investigate be that and any player or coachie wey them find guilty fit pay up to £8,000 as fine.
Una remember say for January when Arsenal beat Manchester United 3-2, Uganda police arrest 20 Arsenal fans for celebrating like say them win league. Although them later release them, Arsenal fans feel say people just dey target them unnecessarily.
As e dey Hot
Golden Eaglets don jabo from U17 AFCON after Burkina Faso beat dem 2-0
The Golden Eaglets of Nigeria don jabo from the 2023 U17 AFCON championship after Burkina Faso beat dem 2-1 for their quarter final match wey shele dis night inside Algeria there.
The match open from the beginning sotay the two sides dey get opportunity wey dem just dey squander anyhow.
But na calamity defending lead to Burkina Faso first goal when one Burkina winger collect the ball from the right, cancel 2 Naija defenders before bending the ball wey keeper save. But instead of defenders to clear the line, dem dey there dey drag leg until Aboubacar Camara put am inside net to make am 1-0.
The boys enter second half begin play under pressure and na another defensive error cause the second goal after one Burkina striker push ball inside 18 only for Naija defender to bring am down clumsily for penarity. The same Aboubacar Camara naim coolly convert the pk to make am 2-0.
But the boys no give up on demsef as dem begin dey pressure Burkina Faso until one ground crossing come in from the left wey one Naija striker flick enter Abubakar Abdullahi leg to tap in to empty net make am 2-1 and game on.
The boys try dem best to equalise but as usual, their inability to score goals become their biggest problem as Burkina Faso hold on to nak Nigeria comot for the 2023 AFCON U17 championship.
As e dey Hot
Golden Eaglets lose 1-0 to Morocco for dem second U17 Afcon match
Naija Under-17 national team, the Golden Eaglets don lose 1-0 for dem second Group B match inside the ongoing U17 AFCON completion wey dey shele inside Algeria.
Immediately match start wey Morocco pass the kick off naim dem carry the ball shoot one shot wey deflect inside net to make am own goal for Tochukwu Ogboji and 1-0 for Morocco.
But the Golden Eaglets take over from there begin press Morocco dey pressure dem sotay dem no even fit cross halfway line. But the problem be say whenever dem get opportunity dem dey miss am anyhow, even some clear chances wey dem just dey balloon anyhow.
The boys enter second half continue dey press Morocco while the Atlas Cubs continue dey defend like say dem life depend on am. But dat wan no stop the Naija boys from breaking dem down but the problem be say, even from close range all the Eaglets shot just dey go off target.
Una remember say Super Eagles skippo, Ahmed Musa promise this boys N500,000 for each goal wey dem score for dis competition. We no come know whether na dat promise dey affect dem wey dem go see big chances dey miss am upandan.
The Atlas Cubs secure all 3 points for the match and dem second clean sheet of the competition. As e be now, Morocco dey top Group B with 6 points while Naija dey second with 3 points.
The Golden Eaglets go play South Africa next on Saturday to decide whether dem go qualify directly from the group or qualify as best losers since na only 3 groups dey the competition.
As e dey Hot
Na against Man City I go know whether Arsenal players preeq still dey stand- Gallas
As Arsenal dey prepare to jam Manchester City for their win or die match wey go shele on Wednesday, former Arsenal defender, William Gallas don come outside dey yan say na for that match him go know whether Arsenal players get balls abi make dem sope otilo.
Arsenal don run through majority of the season on top of Premier League table sotay many fans don give up say make dem kuku leave the league for dem. One supercomputer sef don predict dem to win the whole thing.
But na now wey season dey round up naim Mikel Arteta boys come dey prove to be dem own biggest enemy. First dem squander 2 goals against Liverpool to draw 2-2. Then dem squander another 2 goals to draw 2-2 against West Ham.
But the one wey pain many fans pass na Southampton wey no get demsef come Emirates score 3 goals sotay Arsenal need late equalizer to draw the match 3-3 to make am hat trick of draws for the North London club.
Na diswan don make many people conclude say for dem to crumble when it matters most, Mikel Arteta and him boys no get wetin e take to win the league. But William Gallas believe say na on Wednesday we go find out whether true true the boys still get balls or not.
”Wetin I wan talk now, I know say some people no go like am but na the simple truth. Na on Wednesday against Manchester City I go know whether Arsenal players still get preeq and whether dem preeq still dey stand. I wan see which of the players go man up and which wan go be woman wrapper.”
Arsenal go face Manchester City on Wednesday night for Etihad. Many people believe say The Gunners don already squander their opportunity to win the league and on Wednesday night, Pep Guardiola go put the nail inside their coffin bury dem.
As e dey Hot5 months ago
Na fake World Cup trophy Messi carry take break Instagram record
As e dey Go7 months ago
Thomas Tuchel don warn Graham Potter say nobody send your papa for Chelsea
As e dey Go6 months ago
Argentina World Cup celebration end in tears as 1 fan lose him life
As e dey Go1 year ago
Transfer News: Bayern dey price Mane like market woman dey price onions
As e dey Hot12 months ago
Players and fans join hand beat referee to death for dashing player red card
As e dey Go2 months ago
We buy ticket for Super Eagles to give us joy, instead them increase our anger – fans
As e dey Hot5 months ago
Na Messi I want but na Ronaldo them give me – Al Nassr coachie
Wetin shele gan-gan7 months ago
‘If Ronaldo like make him scratch him blokos for public, who don big don big’ – Cristiano Ronaldo sister