As e dey Go
EPL refs Kevin Friend, Martin Atkinson, Mike Dean and Jon Moss don retire from officiating
We don dey hear now say EPL referee, oga Kevin Friend don retire from officiating. Oga Friend go join other EPL referees like Mike Dean, Martin Atkinson and Jon Moss wey don also retire as season don end so and na diswan don make EPL oga dem begin worry say all of the experienced referees wey dey EPL don retire finish and na small small boys wey fit be the same age with some of the players naim go dey officiate. How all dis Soro-soke generation players wan take respect dem now?
Kevin Friend wey dey 50 years old now start to dey ref match when him dey just 14 years. Seriously o. At dat age the bobo dey officiate match wey senior men dem dey play inside local league for Leicestershire inside Leicester. But not until 2009 when him dey 38 years naim him officiate him first ever EPL match when Wolves kpokpo Fulham 2-1. That same 2009 naim Kevin Friend nak him first red card to Sunderland skippo then, Lorik Cana.
Kevin Friend na no-nonsense referee wey no get time for too many shalaye. Although him name na Friend, when match start the man no dey friendly on top pitch because any player wey do anyhow go subscribe. The bobo don distribute 11 yellow cards plus 1 red card for one match wey him officiate for 2010. The bobo even use anger take nak Wes Brown red card for 2013 although FA later cancel am say the tin wey Brown do no warrant red card. Everybody know the bobo tape sotay dat season wey Leicester win EPL, Tottenham wey also dey challenge for the title no gree make him officiate dem match because him be Leicester fan and e fit go use mistake nak Tottenham red card.
Mike Dean na one of those EPL refs wey go don chop swear wotorwotor
Nobody know exactly why these 4 referees; Friend, Atkinson, Jon Moss and Mike Dean wan retire at the same time especially since na dem be the most experienced refs for the league today. We sha know say players and fans sabi swear for dem well well and we all know say all those swear no good to collect too much especially as pesin dey approach old age. Referee like Martin Atkinson, once Arsenal fans see him name as ref, swear don start even before match start. What about Jon Moss wey teach James Milner for secondary school but when Milner become professional footballer and Jon Moss catch am for pitch, the ref no hesitate to show Milner straight red card. Imagine make your secondary school teacher turn to village people on top your matter, shay you no go nak am better swear?
As for Mike Dean, I no even know where to start from. The guy no dey officiate match wey Liverpool lose because e be like him be secretly Liverpool fan and him village na the next village after Liverpool. Therefore, when the bobo wan officiate 2006 FA Cup final between Liverpool and West Ham, West Ham no gree make him officiate. Even for Wales, fans of Cardiff no like Mike Dean sotay during one match between Cardiff and Swansea, one Cardiff fan throw coins take burs the ref head. But na Arsenal fans still collect pass for the bobo hand after dem lose League Cup final against Birmingham wey him officiate before losing to Chelsea wey Mike Dean nak Arsenal defender Gabriel red card. Na da wan make Arsenal fans open petition for the guy head and over 100,000 fans sign the tin in less than 1 week.
Anyway, we wish the referees all the best for dem future endeavors.
Former Super Eagles skippo, John Obi Mikel don come outside dey shalaye say na almost everyday him dey chat Victor Osimhen dey remind am say make him no join any other club wey no be Chelsea because na club wey go favour am be that.
Osimhen wey be the current African footballer of the year dey currently play for Napoli but everybody believe say soon and very soon the Nigerian hit man go need to leave the club for something bigger.
And Mikel wey be former Chelsea player and legend after him carry them win Champions League believe say na him former club go fit Victor Osimhen pass. According to Mikel:
I know say many other clubs dey chook eyes for Osimhen matter. Clubs like PSG, Liverpool and even Manchester United dey toast am. But I believe say if you watch Chelsea now, our problem na say we no sabi put ball inside net. And the only work wey Osimhen sabi na to put ball into net. If that bobo come Chelsea, walai talai him go blow pass Timaya.
Mikel Obi also say na him dey act as Victor Osimhen agent for this parol. Him say Osimhen fit no be the most flashy player wey too skillful. But just like Haaland, Osimhen sabi put ball inside net and na wetin make am be big player be that.
Victor Osimhen na sharp shooter wey score 26 goals take help Napoli win Italian Serie A for the 2022/23 season. So far, the 25 years old striker don score 13 goals inside 21 appearances for Napoli this season including the hat trick wey him score against Sassuolo for Napoli last Serie A match.
Premier League legend, Alan Shearer don come outside dey draw ear give Marcus Rashford take dey warn am say, if you no take time and begin behave yourself, you go waste this your talent and your career. This one na after Marcus Rashford miss Manchester United FA Cup 4-2 win against Newport on Sunday.
According to Manchester United manager, Erik Ten Hag, Rashford miss the match because him call in sick on the Friday before the match say him no go fit make am. But reports show say Rashford been go one night club on that Wednesday go over enjoy and na since after that club naim wetin dey do am begin do am. Ten Hag say na internal matter so him go deal with am internally.
But this one don make many people dey wonder say which kind internal issue go make player no even turn up on the day of match? Alan Shearer also recall sometime last season when the same Marcus Rashford chop punishment after him arrive late for meeting before one of them league matches.
Alan Shearer
Na this one don make Shearer wey be Premier all-time top scorer de shake head with pity say Rashford just want to waste him talent. According to the legendary striker:
Marcus Rashford get big talent o, but the problem now be say him just want to waste am. Because we see the boy when him serious last season na. But this season so far, I no know wetin be him problem, whether him get family problem abi him girlfriend dey give am problem, or maybe na just village people, we need to help this boy and find out wetin be the problem otherwise him go just waste him career for nothing.
Alan Shearer also advice Rashford to find better manager and surround himself with wise people wey go dey remind am say if him continue like this and him career end, then him go truly regret him life and him wasted talent.
For now we dey wait to see how Erik Ten Hag wan take resolve Marcus Rashford internal problems.
As AFCON 2023 don enter knockout stage wey them don pair Nigeria to play Cameroon for the Round of 16 so, Super Eagles legend, Segun Odegbami don come outside like KingKong dey beat him chest say this Cameroon match go too easy for Nigeria because we go beat them like small pikin.
This one dey come after the AFCON wey dey happen inside Ivory Coast progress from the group stage enter knockout stages. This talk confuse many people because even for the group stage self, the Super Eagles no really impress as them manage to score only three goals in their three matches still finish second for the group.
On top of that the ball wey them dey play no even dey sweet for eyes make we say na that one we take hold body self. But on top of all of this, Mathematical Segun believe say Nigeria wey no dey give fans joy go easily beat and eliminate five-time AFCON champions, Cameroon from the competition.
Segun Odegbami believe say Cameroon no be Nigeria mate
According to Odegbami:
Na this Cameroon wey everybody dey fear naim go be our easiest match for this AFCON. Because all those their gidigbo football wey them like to dey play no go work for this new stadium wey we dey go. The former stadium wey them been dey play rough like farmland. But na this smooth pitch naim we go catch them take show them correct pepper.
Segun Odegbami also talk say the Super Eagles dey improve for them game because after drawing their first match them win the last two. According to the legend, na progressive that so no shaking for that Round of 16 match.
Nigeria go play Cameroon for their Round of 16 match wey go happen on Saturday by 9pm Nigeria time. Wetin you think about that match? Abeg tell us for comment section.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans