Connect with us

Wetin shele gan-gan

Barcelona go sack me if I no win trophy this season – Xavi

Published

on

Barcelona go sack me if I no win trophy this season- Xavi

As Barcelona don lose 3-1 to Real Madrid on Sunday for El Clasico wey push them enter second for La Liga table, Barcelona coachie, oga Xavi Hernandez don come outside with sorrow for him voice dey shalaye say after all the spending wey the club spend on top new players, if him no win trophy dis season, the club no go think am twice to sack am troway.

According to the coachie; I no kuku dey whyne myself about anything because after spending all that money to take sign players during transfer window, Barcelona presido himself don call me go corner and warn me say, if I no win trophy with this players, then heads go roll and the first head wey go comot na my own.

Una remember say Barcelona empty their bank account, break their kolo still sell plenty TV rights on top just to find money take sign ogbonge players give Xavi make him take perform. Players like Robert Lewandowski, Jules Kounde, Raphinha, Andreas Christensen and Franck Kessie, all of dem join the club this season.

Barcelona go sack me if I no win trophy this season- Xavi

Despite spending £150m this season, Barcelona still dey play igbakugba

Yet, despite spending nearly 150 million pounds on top this players head, then enter Champions League begin play like Europa League club, lose 2 and draw 1 of them 4 matches so far and right now, na Europa don dey sure for them. Even for La Liga wey dem been dey top, Real Madrid beat them on Sunday to push them down for table.

Na all this one don make Xavi Hernandez don use him teeth take count him tongue begin give himself advice and motivation. According to am, after Real Madrid beat Barca, all the messages wey him dey get for inbox be like say person die. But him say even that one no go stop am as him don ready to continue the work and make sure say Barca win trophy this season.

If you remember, Chelsea sack them former coachie, oga Thomas Tuchel after spending 271 million pounds for am on top transfer market. Them no even wait to see whether him fit win trophy or not because with that kind squad, you no even suppose dey lose match. Na to see now whether Xavi go win trophy abi Barcelona go serve am breakfast before season end.

As e dey Go

Victor Osimhen refuse to play penarity for Napoli after TikTok admin use am do yeye

Published

on

Victor Osimhen apologise to Napoli coachie

My people e be like say Naija striker, Victor Osimhen don comot body from penarity matter for Napoli. Dis na because when Napoli win penarity kick for dem first goal during dem match with Udinese last night, when everybody dey expect Osimhen to carry tha ball play the thing as Napoli penarity taker, the 24 years old striker no even near there.

Na diswan make him Napoli teammate, Piotr ZielinskI carry the ball, convert the penarity to make am 1-0 for Napoli. Na Victor Osimhen score the second goal as the Serie A defending champions finally win the match 4-1.

Una remember say gbege burst during Napoli last match when dem draw 0-0 with Bologna. As the club dey hustle for goals during that match naim ref nak dem penarity. As dem penarity taker wey him be, Victor Osimhen step up only to play the ball off target.

Maybe Na diswan make coachie, Rudi Garcia substitute the Super Eagles striker from the match wey make Osimhen provoke hala for the coachie. Although the boy later apologise to the coachie and him teammates, da wan no stop Napoli TikTok people from using one short video take yab the boy.

FIFA nominate Victor Osimhen for the 2023 Best Player Award

Inside the video, dem show Osimhen dey beg for penarity and when dem give am the penarity, him troway am. The video contain all dis baby-baby voice wey dey pain well well if na you dem dey use am against. The TikTok video provoke many Naija people wey make dem vex go pressurize Napoli until dem delete the video.

The thing pain Victor Osimhen well well too wey make him agents release statement say dem ready to sue Napoli for dat kind nonsense behaviour. Although the bobo show professionalism to still turn up for dem match last night despite the provocation, him refuse to shake hands with some of him teammates. And now, the boy don comot body for anything penarity for Napoli.

 

Continue Reading

As e dey Go

FIFPRO don warn NFF to pay Super Falcons dem money or…..

Published

on

Naija Super Falcons lose dem first match for WAFCON against South Africa
Football Yarns

International Federation of Professional Footballers wey be FIFPRO for short don chuk mouth for the money wahala between the Nigerian Football Federation (NFF) and the Super Falcons wey just jabo from the ongoing FIFA Women’s World Cup wey dey shele for Australia and New Zealand.

FIFPRO nah the organization wey dey look after players dem welfare for world football. If e get any player anywhere in the world wey be sey dem wan cheat or run street, dem go rush go there like Superman go settle the matter.

Nah the same FIFPRO don visit Super Falcons matter and don assure dem sey all of dem go receive all the money wey NFF don dey owe dem since 2021. FIFPRO dey look after more than 65,000 footballers for world football sey:

‘We go like thank all the Super Falcons players and staff for their professionalism before, during and after dem jabo from the World Cup. We dey assure una sey all of dem go collect their money even 10kobo nor go remain. This nah wetin we dey do for our members’

FIFPRO don warn NFF to pay Super Falcons dem money or…..

FIFPRO go make NFF pay Super Falcons

We go remember sey Super Falcons almost collect walk-over for World Cup because of unpaid salaries and bonuses. But dem finally nor allow the matter distract dem as dem qualify for group wey get Australia and Canada. Even if dem lose to England on penarity shootout, dem really show Naija to the world.

As e be so, money matter sure pass for dem now and as FIFA through FIFPRO don take up their case, football people don dey gyrate onto sey nah where person dey work person suppose chop.

Continue Reading

Wetin shele gan-gan

One Messi fan don lose him cleaner job after collecting Messi autograph

Published

on

One Messi fan don lose him cleaner job after collecting Messi autograph

No be only good good thing dey happen inside Miami since wey Lionel Messi enter the city because we don dey hear now say one Lionel Messi fan wey dey work as cleaner inside Inter Miami stadium don lose him job after him lose focus of him work just to collect Messi autograph.

According to the tory, the Messi fan, Mr Cristian Salamanca wey leave him village for Columbia enter America just to find work, finally get work as cleaner inside Inter Miami DRV PNK Stadium. But him first day for work naim turn out to be him last day as well when him decide say Lionel Messi autograph important pass the work wey him just get.

Cristian really plan the thing well because him wear Argentina jersey under him overall when him resume shift for the gate wey Inter Miami players go pass enter for dem last match against Orlando City. Na Lionel Messi enter last and immediately Cristian see Messi, him begin hail am like all this agberos dey hail big man for road dey call am Odogwu, Big Shoe, World Champion etc.

Immediately Lionel Messi turn to look who dey hail am like Pasuma so, na so the bros open him overall to reveal him Argentina jersey. Na da wan sweet Messi bele well well wey make am kukuma waka come meet Cristian use marker take sign autograph for the bobo Argentina jersey.

One Messi fan don lose him cleaner job after collecting Messi autograph

Messi fans dey worship am like god

The autograph make the Messi fan happy well well but him happiness no last because stadium workers get one law say dem no go harass players or even ask dem for autograph while on duty. Na dat rule naim Cristian break and immediately naim one security man come arrest am escort am go dem oga kpatakpata office where dem sack am with immediately alacrity.

But the Messi fan don come outside dey yan say if dem like make dem sack am 1 million times, dat single autograph wey him collect worth am well well. E say although him no like the way wey dem treat am, him no get any bad feelings because Messi don already give am everything him need.

Continue Reading

Trending