Former Barcelona wonder boy, Riqui Puig don come outside with anger dey point accusing finger inside the eyes of Barcelona coachie, Xavi Hernandez say Xavi pretend to be their family friend but the way him later treat am for Barca, na only village enemy fit treat person like that.
According to the 23-years old midfielder wey currently dey play for LA Galaxy inside American League, e get when Xavi dey beg am to come join am for him club for Qatar say na him be the next big thing. But when him later become Barcelona coachie, him begin treat am like orphan.
Puig na Spanish midfielder wey be one of the promising young players from Barcelona academy. This boy good well well sotay many people believe say na him go be the next Xavi Hernandez wey Barca go get.
But e be like say say Xavi no want make Barcelona get another of am so immediately him become coachie of Barcelona, e begin push the boy aside. Not until the beginning of last season wey the coach finally tell Puig say make him better go find club because this Barcelona no go contain the two of them.
Na wetin make the boy finally pack all him bags and baggage go join LA Galaxy but even then the boy mind no sweet at all. And na this one don make am come outside now begin tackle the Barcelona coachie for the bad way wey him treat am despite being a family friend. According to am:
“Xavi suppose be like a father figure to me o. Because dis man from my village sef. Him and my papa dem be paddy. When him be coachie of Al Sadd na so e go dey call my papa upandan to allow me come play for am for Qatar. But when him finally get the opportunity to play with me as coachie of Barcelona, him begin show me him true colour”
Riqui Puig say the one wey pain am pass na as Xavi come dey treat am like orphan. Him no allow am train with the team. Then whenever them wan go for tour, him no go gree make him follow go. Na this one come make am begin wonder how this man wey love am before come hate am so much now.
Anyway, Riqui Puig say him finally kuku decide to leave the club for am after all no be him papa get am and even though e pain am well well because him dey dream of becoming a Barcelona legend, las las them no bury him umbilical cord for there.
Guinea player wey accuse him coachie of stealing jersey wey Vinicius dash am go miss AFCON
Guinea midfielder, Morlaye Sylla name nor dey the list of players wey go play this CAF African Cup of Nations wey go take place for Ivory Coast next month after him accuse Guinea national team coach, Kabba Diawara of stealing jersey wey Vinicius Junior give am when them play friendly match with Brazil for June this year.
Wahala start when Sylla find out sey jersey wey him swap with Vini Jnr wey him carry enter dressing room dey miss. Him start dey hala sey how jersey wey him carry enter dressing room go just borrow leg like that. Him start dey search everywhere.
After him search everywhere, him sey him go search all the players for the dressing room sey nah them steal am. Then later, him start to dey accuse their team coach, Kabba Diawara, sey nah him steal the jersey.
Nah this one make the coach and Guinea FA sey him nor go play for them again unless him apologize. But Sylla nor gree apologize. Him sey him dey on him right as him expect Guinea FA to focus more on who thief him original jersey wey nor be okrika.
Guinea go start their AFCON on 15th January when them go play Cameroon before them play Gambia and then defending champions, Senegal.
I wan see more black coaches for professional football – Yaya Toure
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Romelu Lukaku agents Roc Nation don drop am because him na bad market
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
As e dey Go1 year ago
Thomas Tuchel don warn Graham Potter say nobody send your papa for Chelsea
As e dey Go1 year ago
Argentina World Cup celebration end in tears as 1 fan lose him life
As e dey Go2 years ago
Transfer News: Bayern dey price Mane like market woman dey price onions
As e dey Hot1 year ago
Na fake World Cup trophy Messi carry take break Instagram record
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Go11 months ago
We buy ticket for Super Eagles to give us joy, instead them increase our anger – fans
As e dey Hot2 years ago
Players and fans join hand beat referee to death for dashing player red card
Wetin shele gan-gan7 months ago
FIFA dey investigate Zambia coachie for rubbing him female players chest again