As e dey Go
Transfer news: Leicester don hammer £85m on top Fofana head, Balogun go leave Arsenal on loan
We don dey hear now say Leicester city don hammer bride price of 85 million pounds on top the head of dem defender, Wesley Fofana. Dis money wey dem nak on top the guy head na to discourage any other club from coming to marry the player comot.
Una remember say Chelsea don dey chook eyes for Fofana body after Barcelona hijack Jules Kounde from dem. But with dis kind hooge money wey Leicester don put for the guy head so, dem don dey tell Chelsea say dem no ready to sell the player but if dem really serious to buy am then make dem ready to spend the kind money wey both Liverpool and Manchester United spend on top Van Dijk and Maguire.
Chelsea sef don kuku get the memo and dem don remove eyes from Fofana body begin look elsewhere, especially for Italy for dem defensive replacement. As e be now, dem don dey eye 2 Inter Milan defender wey be Denzel Dumfries and Milan Skriniar.
Folarin Balogun to leave Arsenal on loan
Naija blood, Folarin Balogun don agree to leave Arsenal on loan to join Reims inside French Ligue 1. The loan contract go last till next year. Balogun been dey complain say him no dey see playing time for Arsenal so hopefully him go play many matches for Reims.
Balogun get potential but somehow e no dey gel for Arsenal
Balogun na 21 years old striker wey don dey Arsenal all him career. While many people see am as one of the best young players for Arsenal academy then, him never really show say him get the morah to be the best for the main squad because whenever dem give am opportunity, him no dey fit take am.
Dis no go be the first time wey Balogun dey go on loan sha as the bobo spend last season on loan for Middlesbrough where him play 18 matches score 3 goals. Balogun don play age grade football for England although him fit play for Nigeria because him papa and mama from Naija. Him also fit play for USA because na there dem born am so him be citizen.
Manchester City don wash hand from Cucurella matter
Manchester City don finally decide to do like Pontius Pilate and wash dem hand comot from Marc Cucurella matter. According to the EPL champions, dem give up on the guy transfer because him club, Brighton and Hove Albion dey behave like amusu on top the guy matter.
Manchester City been dey toast Cucurella like sugar daddy dey toast slay queen but now dem don finally wash dem hand from the guy matter
E don tay wey City begin toast Cucurella to con replace Zinchenko wey dem plan to sell give Arsenal and the bobo don gree to join dem, even submit transfer request to Brighton. But instead of Brighton to give City igbankwu list and bride price wey dem go fit pay, dem nak 50 million pounds on top the guy head while City wan pay 40 million. And dis na exactly why we were where we wan wear where.
Chelsea wan hijack Frenkie De Jong from Manchester United
E be like say Chelsea never ready to give up on top Frenkie De Jong matter as we don dey hear say The Blues don ready to hijack the Netherlands player transfer from Barcelona. Manchester United don dey on top De Jong matter since 19kokoro but because of the ogbonge salary wey Barca dey owe am plus other commitments, De Jong no wan leave the club.
Chelsea wan hijack De Jong transfer from Manchester United
Chelsea been show interest one time before dem decide to face dem front small. But now e be like say Chelsea don finally decide say na De Jong be the way forward and dem don ready to do everything including selling Azpilicueta and Alonso to Barca to make sure say if the 25 years old boy decide to leave Barcelona dis transfer window, dem go redirect him movement straight to Stamford Bridge.
Former Super Eagles skippo, John Obi Mikel don come outside dey shalaye say na almost everyday him dey chat Victor Osimhen dey remind am say make him no join any other club wey no be Chelsea because na club wey go favour am be that.
Osimhen wey be the current African footballer of the year dey currently play for Napoli but everybody believe say soon and very soon the Nigerian hit man go need to leave the club for something bigger.
And Mikel wey be former Chelsea player and legend after him carry them win Champions League believe say na him former club go fit Victor Osimhen pass. According to Mikel:
I know say many other clubs dey chook eyes for Osimhen matter. Clubs like PSG, Liverpool and even Manchester United dey toast am. But I believe say if you watch Chelsea now, our problem na say we no sabi put ball inside net. And the only work wey Osimhen sabi na to put ball into net. If that bobo come Chelsea, walai talai him go blow pass Timaya.
Mikel Obi also say na him dey act as Victor Osimhen agent for this parol. Him say Osimhen fit no be the most flashy player wey too skillful. But just like Haaland, Osimhen sabi put ball inside net and na wetin make am be big player be that.
Victor Osimhen na sharp shooter wey score 26 goals take help Napoli win Italian Serie A for the 2022/23 season. So far, the 25 years old striker don score 13 goals inside 21 appearances for Napoli this season including the hat trick wey him score against Sassuolo for Napoli last Serie A match.
Premier League legend, Alan Shearer don come outside dey draw ear give Marcus Rashford take dey warn am say, if you no take time and begin behave yourself, you go waste this your talent and your career. This one na after Marcus Rashford miss Manchester United FA Cup 4-2 win against Newport on Sunday.
According to Manchester United manager, Erik Ten Hag, Rashford miss the match because him call in sick on the Friday before the match say him no go fit make am. But reports show say Rashford been go one night club on that Wednesday go over enjoy and na since after that club naim wetin dey do am begin do am. Ten Hag say na internal matter so him go deal with am internally.
But this one don make many people dey wonder say which kind internal issue go make player no even turn up on the day of match? Alan Shearer also recall sometime last season when the same Marcus Rashford chop punishment after him arrive late for meeting before one of them league matches.
Alan Shearer
Na this one don make Shearer wey be Premier all-time top scorer de shake head with pity say Rashford just want to waste him talent. According to the legendary striker:
Marcus Rashford get big talent o, but the problem now be say him just want to waste am. Because we see the boy when him serious last season na. But this season so far, I no know wetin be him problem, whether him get family problem abi him girlfriend dey give am problem, or maybe na just village people, we need to help this boy and find out wetin be the problem otherwise him go just waste him career for nothing.
Alan Shearer also advice Rashford to find better manager and surround himself with wise people wey go dey remind am say if him continue like this and him career end, then him go truly regret him life and him wasted talent.
For now we dey wait to see how Erik Ten Hag wan take resolve Marcus Rashford internal problems.
As AFCON 2023 don enter knockout stage wey them don pair Nigeria to play Cameroon for the Round of 16 so, Super Eagles legend, Segun Odegbami don come outside like KingKong dey beat him chest say this Cameroon match go too easy for Nigeria because we go beat them like small pikin.
This one dey come after the AFCON wey dey happen inside Ivory Coast progress from the group stage enter knockout stages. This talk confuse many people because even for the group stage self, the Super Eagles no really impress as them manage to score only three goals in their three matches still finish second for the group.
On top of that the ball wey them dey play no even dey sweet for eyes make we say na that one we take hold body self. But on top of all of this, Mathematical Segun believe say Nigeria wey no dey give fans joy go easily beat and eliminate five-time AFCON champions, Cameroon from the competition.
Segun Odegbami believe say Cameroon no be Nigeria mate
According to Odegbami:
Na this Cameroon wey everybody dey fear naim go be our easiest match for this AFCON. Because all those their gidigbo football wey them like to dey play no go work for this new stadium wey we dey go. The former stadium wey them been dey play rough like farmland. But na this smooth pitch naim we go catch them take show them correct pepper.
Segun Odegbami also talk say the Super Eagles dey improve for them game because after drawing their first match them win the last two. According to the legend, na progressive that so no shaking for that Round of 16 match.
Nigeria go play Cameroon for their Round of 16 match wey go happen on Saturday by 9pm Nigeria time. Wetin you think about that match? Abeg tell us for comment section.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans