For Transfer news today, we don dey hear say Taiwo Awoniyi fit dey play for EPL by the start of next season as Nottingham Forest wey just gain promotion enter EPL don dey ready to count 17.5 million pounds inside Ghana-must-go pack everything go give Union Berlin to take sign the Super Eagles striker. If that happen, Awoniyi go become the most expensive signing for Nottingham Forest history. Before then, na Joao Carvalho wey dem sign with 13.5 million pounds be their most expensive player.
Taiwo Awoniyi wey dey 24 years old na former Liverpool player wey join the club for 2015 when him dey just 18 years old, scoring 7 goals inside 9 matches for Naija Under-20. But the guy lock no shine for Liverpool because him no ever see jersey to play for the first team wey instead dem send am go loan 7 times. Na diswan make the bobo use him teeth take count him tongue after 6 years of to waka inside the desert of Liverpool say e better make him kuku go find club wey go love am and where him go feel at home. Na wetin make am rush marry Union Berlin be dat and to return the love, Awoniyi score 15 league goals wey carry dem finish 5th for Bundesliga wey carry dem straight into Europa.
But many people don dey advice the bobo make him never leave Union Berlin yet because na only 1 season him don play with dem as dem full player so make him stay there establish himself well and remove the spirit of waka-waka from him body before making anada move. After all he’s just 24 years so time dey him side. Moreover shebi Union Berlin dey go Europa League so why him wan leave dem go join relegation club?
Manchester United don ready to complete Antony transfer
We don dey hear now say Manchester United oga dem don land gidigba inside Amsterdam to complete the igbankwu between the club and dis young Ajax winger, Antony, on top 40 million pounds dowry. If this happen, e go be United first signing for dis transfer window which show say e be like dem don finally ready for shopping.
Antony shine under Erik Ten Haag for Ajax with 12 goals and 10 assists from wing
Antony help Ajax win dem second back-to-back Eredivisie title inside Netherlands there under the new United coachie, oga Erik ten Haag. And as other players dey shame to join United, Ten Haag don kukuma decide to sign familiar face, starting with dis bobo. Antony dos Santos na 22 years old Brazilian winger wey score 12 goals and 10 assists from the right wing. And since United no get any established right winger, signing Antony wey don already break into Brazil national team no bad. Antony go be the first of 5 players wey Ten Haag plan to buy join United squad.
Arsenal don ready to pay £50m for Raphinha
For our last transfer news today, Arsenal don dey show say dem really serious for dis transfer market as dem don ready to drop 50 million pounds to take marry Raphinha from Leeds United. If diswan happen, e go mean say Arsenal don dey become another Brazilian team with at least 3 Brazilians there already and the club dey pursue 2 others.
Raphinha celebrating goal for Leeds
Raphinha na 25 years old Brazilian winger wey score 11 goals on top 3 assists for Leeds last season. Na him performance make many clubs begin rush am like bee on top honey sotay even Barcelona and Tottenham prepare to die on top the guy matter. But Arsenal wan do dem the more you look the less you see and dem wan use dat scope take rush sign the guy before Tottenham even know wetin dey sop.