As e dey Go
Former Portsmouth player wey dump football for teaching job say him no regret am
One former Portsmouth player wey abandon him professional football career to focus on secondary school teaching job don come outside dey shalaye say him no regret that decision at all at all. The player, Joe Hancott retire from football back in 2021 when him dey just 20 years old.
But if you look Joe starting you no go believe say the bros go end quickly like that. The bobo break into Portsmouth first team back in August 2017 when him dey just 16 years old. In fact Joe break the record to become the youngest player to ever play for Portsmouth. Na the current Wolves Coachie, oga Gary O’Neil been hold that record.
Because of diswan naim make many people begin believe say Joe na special talent wey go go very far. Na so dem send Joe out on loan make him go dey get regular playing time but unfortunately, the bobo no even see single match player.
But Portsmouth continue to dey believe in the boy even when injury begin give am problem and him game begin drop badly. Dem still dey nak am new contract on top heavy scholarship believing say na good investment and when dem sell am to big clubs, dem go make hooge money.
Joe Hancott don become PE teacher for secondary school
Na when Portsmouth wan nak am the new 6 month contract plus scholarship for 2021 naim Joe tell dem say nna shay suffer no dey taya una? And na like so Joe take give up on football. And now, two years later, Joe Hancott say him no regret am at all. According to the 22 years old boy:
”At the time wey I retire, football no dey sweet me again. In fact I don fall out of love with the game. I still love to watch am for TV or for stadium o, but to enter pitch as a player, I don already comot body. Maybe na because of all the injury and the stress as a defender wey I be, but regardless, the tin don taya me.”
As God may have it, Joe don already begin study sports management for open university even before him retire and immediately him finish the course, him secondary school employ am to become their PE teacher. So na dat teaching job the bobo take dey hold side right now.
Joe Hancott don begin play football again for Wessex Football League wey be the 9th division for England. But whether him go ever decide to join the big boys again naim we no come know again. At just 22 years old now, time still dey him side.
After collecting dat humiliating 3-0 flogging inside Old Trafford, Manchester United coachie, oga Erik ten Hag don come outside dey announce to the world say him boys play very well regardless of wetin the score line talk.
Ten Hag defensive formation look like e get comma because na both Harry Maguire and Johnny Evans start while Raphael Varane dey bench. Also the coachie start Victor Lindelof for left back when Regulion wey be natural left back dey bench.
VAR award City penarity after Rasmus Hojlund drag Rodri down inside 18 yard box. Erling Haaland use dat penarity take rediscover him Premier League scoring form to make am 1-0. Andre Onana make many excellent saves for dat match but him no fit deny Haaland second goal with one powerful header to make am 2-0.
Erling Haaland destroy Erik ten Hag boys
The third goal come after Onana make another excellent save to deny Rodri, only for the ball to come meet Haaland wey square the ball back for Phil Fodden to complete am 3-0. But Erik ten Hag don come outside dey defend him boys performance say dem play well. According to am:
If you watch the first half you go see am say nothing City take pass us. We jam dem head to head, if no be dat penarity maybe e for be first half draw. Even with the penarity sef, we too create chances wey we just no convert. See dat McTominay own, on a good day goal be dat ball. So yesterday na just bad day for market for us.
Manchester United don lose five out of 10 league matches so far dis season. Out of those five losses, three na for Old Trafford. And as e be now, dem dey 8th position on top table, eight points behind the Top 4 and 11 points behind Tottenham wey dey top league.
As e dey hot, we don dey hear say one footballer inside American League, Yohance Alexander don threaten to stab referee if him catch am for street. The reason for dis kind vawulence na because the ref nak Alexander red card during dem cup match wey shele inside New York.
Na during the 2024 US Open Cup Qualifying game between Alexander club, NY Renegades vs NY Pancyprians-Freedoms naim dis matter happen. According to the tory, NY Renegades dey collect 3-0 kponking when dem vex turn football to karate begin kick opponents leg instead of ball.
E no tay naim quarrel start and to settle the quarrel, ref begin distribute yellow card to the players of both teams wey involve for the fight. But somehow, Yohance Alexander no grading wetin dey happen na so e begin go dey argue with ref o.
Na dat argument make ref vex nak am red card but instead of to respect himself leave the pitch, Alexander continue to dey insult the ref until e vex tell the ref make e pray make him no catch am for street because if e catch am there, e go stab am anyhow.
Some players just like to dey fight referee especially when dem collect red card
Na dat threaten make the referee provoke end the match after only 74 minutes and right now we dey hear say dem also don disqualify NY Renegades from the tournament because of the bad talk wey Yohance Alexander talk.
We also dey hear say Alexander fit collect one long ban from the league for dat threaten wey him threaten referee. On top of dat, both him and him club go chop huge fine so dat tomorrow if dem see referee, dem go respect am well well.
We don dey hear now say Senegal striker, Sadio Mane don buy one football club inside France wey dem dey call Bourges Foot 18. The club dey play for the fourth division of French League.
According to the tory, e don tay wey Sadio Mane don dey find club wey him go buy but e no work out until now. And the former Liverpool winger no be stranger for Bourges Foot as him don dey donate money give the club right from time to help dem pay salary and buy players for more than 3 years.
Na all dis good-good things wey him dey do make am become paddy with the owner of the club as well as the mayor of the town wey the club locate. And as e be now, the club president don kuku advise am to close eyes buy the club so dat him go begin control the club fully.
Mane currently dey play for Al-Nassr inside Saudi
Bourges Foot 18 currently dey second to the last for Group B of French fourth division. But the club been dey perform better pass like dis, in fact the club don play for Ligue 2 before wey be the second division of French league. But since then things no go well with dem wey don push dem enter Division 4 so.
But as e be now, the club president and Mayor of the town believe say the way forward na to sell the club give Sadio Mane. And Mane sef wey start him football career for France, don tell dem say him plan na to reorganize the club and return am back to dem former glory.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go12 months agoArgentina World Cup celebration end in tears as 1 fan lose him life
-
As e dey Hot11 months agoNa fake World Cup trophy Messi carry take break Instagram record
-
As e dey Go2 years agoTransfer News: Bayern dey price Mane like market woman dey price onions
-
Wetin shele gan-gan1 year agoRonaldo wan leave Manchester United for January because him don tire to be second choice
-
As e dey Go9 months agoWe buy ticket for Super Eagles to give us joy, instead them increase our anger – fans
-
As e dey Hot1 year agoPlayers and fans join hand beat referee to death for dashing player red card
-
As e dey Hot1 year agoSee how Romelu Lukaku beg Simone Inzaghi like prodigal son to let am return back to Inter Milan