No be small sontin dey shele between two former teammates because football legend, Zlatan Ibrahimovic don come outside dey blast him former Inter Milan teammate, Mario Balotelli say him waste all the talent wey God give am, even squander many opportunities wey other footballers no get.
42-years-old Ibrahimovic wey just hang boot not long ago after him long career, play with Balotelli for Inter Milan between 2007 and 2009. Then Balotelli na one of the hottest young strikers for the whole of Europe wey many people believe say him get the talent to go far.
Unfortunately the former Italy striker wey currently dey play for Adana Demirspor inside Turkey no reach anywhere near the level wey many people expect am to reach. Na diswan make Ibro don come outside dey shake head take dey talk say Balotelli na waste of talent. According to am:
”Balotelli get talent as a young player o. And God still bless am him dey see plenty opportunities to make sure say him achieve him potentials. But Balotelli no take any single of those opportunities. Opportunities wey many players dey suffer dey find just one, Balo balloon every single ones wey him get. E just waste talent wey God give am.
Mario Balotelli play just one more season with Inter Milan under Jose Mourinho and na dat season him win Champions League. And Balotelli don kuku use the Champions League as response to Ibrahimovic wey never win UCL for him long career filled with trophies.
After leaving Inter, Balo wey dey 33 years old don play with some big clubs including Manchester City, Liverpool, AC Milan and even Inter Milan again. But even though we go remember am as one of those footballers with talent, nobody go remember am as a legend of the game.
Forget about the 3-0 flogging, Manchester United play very well – Erik ten Hag
After collecting dat humiliating 3-0 flogging inside Old Trafford, Manchester United coachie, oga Erik ten Hag don come outside dey announce to the world say him boys play very well regardless of wetin the score line talk.
Ten Hag defensive formation look like e get comma because na both Harry Maguire and Johnny Evans start while Raphael Varane dey bench. Also the coachie start Victor Lindelof for left back when Regulion wey be natural left back dey bench.
VAR award City penarity after Rasmus Hojlund drag Rodri down inside 18 yard box. Erling Haaland use dat penarity take rediscover him Premier League scoring form to make am 1-0. Andre Onana make many excellent saves for dat match but him no fit deny Haaland second goal with one powerful header to make am 2-0.
The third goal come after Onana make another excellent save to deny Rodri, only for the ball to come meet Haaland wey square the ball back for Phil Fodden to complete am 3-0. But Erik ten Hag don come outside dey defend him boys performance say dem play well. According to am:
If you watch the first half you go see am say nothing City take pass us. We jam dem head to head, if no be dat penarity maybe e for be first half draw. Even with the penarity sef, we too create chances wey we just no convert. See dat McTominay own, on a good day goal be dat ball. So yesterday na just bad day for market for us.
Manchester United don lose five out of 10 league matches so far dis season. Out of those five losses, three na for Old Trafford. And as e be now, dem dey 8th position on top table, eight points behind the Top 4 and 11 points behind Tottenham wey dey top league.
American footballer threaten to stab referee for street because of red card
As e dey hot, we don dey hear say one footballer inside American League, Yohance Alexander don threaten to stab referee if him catch am for street. The reason for dis kind vawulence na because the ref nak Alexander red card during dem cup match wey shele inside New York.
Na during the 2024 US Open Cup Qualifying game between Alexander club, NY Renegades vs NY Pancyprians-Freedoms naim dis matter happen. According to the tory, NY Renegades dey collect 3-0 kponking when dem vex turn football to karate begin kick opponents leg instead of ball.
E no tay naim quarrel start and to settle the quarrel, ref begin distribute yellow card to the players of both teams wey involve for the fight. But somehow, Yohance Alexander no grading wetin dey happen na so e begin go dey argue with ref o.
Na dat argument make ref vex nak am red card but instead of to respect himself leave the pitch, Alexander continue to dey insult the ref until e vex tell the ref make e pray make him no catch am for street because if e catch am there, e go stab am anyhow.
Na dat threaten make the referee provoke end the match after only 74 minutes and right now we dey hear say dem also don disqualify NY Renegades from the tournament because of the bad talk wey Yohance Alexander talk.
We also dey hear say Alexander fit collect one long ban from the league for dat threaten wey him threaten referee. On top of dat, both him and him club go chop huge fine so dat tomorrow if dem see referee, dem go respect am well well.
Sadio Mane don buy football club inside France
We don dey hear now say Senegal striker, Sadio Mane don buy one football club inside France wey dem dey call Bourges Foot 18. The club dey play for the fourth division of French League.
According to the tory, e don tay wey Sadio Mane don dey find club wey him go buy but e no work out until now. And the former Liverpool winger no be stranger for Bourges Foot as him don dey donate money give the club right from time to help dem pay salary and buy players for more than 3 years.
Na all dis good-good things wey him dey do make am become paddy with the owner of the club as well as the mayor of the town wey the club locate. And as e be now, the club president don kuku advise am to close eyes buy the club so dat him go begin control the club fully.
Bourges Foot 18 currently dey second to the last for Group B of French fourth division. But the club been dey perform better pass like dis, in fact the club don play for Ligue 2 before wey be the second division of French league. But since then things no go well with dem wey don push dem enter Division 4 so.
But as e be now, the club president and Mayor of the town believe say the way forward na to sell the club give Sadio Mane. And Mane sef wey start him football career for France, don tell dem say him plan na to reorganize the club and return am back to dem former glory.
As e dey Go1 year ago
Thomas Tuchel don warn Graham Potter say nobody send your papa for Chelsea
As e dey Go12 months ago
Argentina World Cup celebration end in tears as 1 fan lose him life
As e dey Hot11 months ago
Na fake World Cup trophy Messi carry take break Instagram record
As e dey Go2 years ago
Transfer News: Bayern dey price Mane like market woman dey price onions
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Go9 months ago
We buy ticket for Super Eagles to give us joy, instead them increase our anger – fans
As e dey Hot1 year ago
Players and fans join hand beat referee to death for dashing player red card
As e dey Hot1 year ago
See how Romelu Lukaku beg Simone Inzaghi like prodigal son to let am return back to Inter Milan