Cristiano Ronaldo tell him agent to give am Chelsea/Bayern or get lost

We don dey hear now say the reason why football legend, Cristiano Ronaldo break up with him agent, Jorge Mendes na because the Al Nassr striker ask the agent to secure him move to either Chelsea or Bayern Munich and the agent fail.

According to the tory, no be today the gbege between Ronaldo and him agent start o, because na right from when Ronaldo decide to leave Real Madrid wey Jorge Mendes advice am say na bad idea yet Ronaldo still chook head, na since then crack appear.

But the whole thing come worse after Ronaldo first season as a Manchester United player wey the club no qualify for champions league. Immediately season end naim Ronaldo tell Jorge Mendes say time don reach to show why him truly be super agent and help am escape Manchester United enter club wey dey go UCL.

Ronaldo want make him agent save am from Manchester United by securing move to Chelsea or Bayern Munich

According to one report for Spanish media, Ronaldo tell the agent say: all the hooge money wey I dey pay you, time don reach to show me say you deserve am. So either you help me escape United enter Chelsea or Bayern Munich or make you getat and never come near me again.

We hear say the man try him best to land Ronaldo inside both Chelsea and Bayern sotay Chelsea owner, oga Todd Boehly even wan sign am if no be say Thomas Tuchel reject am. CEO of Bayern self, oga Oliver Khan admit say them dey talk to Ronaldo whether them fit sign am.

Unfortunately, na Ronaldo be the reason why Bayern no sign am because once them hear say the GOAT no gree report for Manchester United pre-season training, Bayern Munich quickly comot body.

But the one wey scatter the whole relationship between Ronaldo and Mendes na that Piers Morgan interview wey oga Mendes warn Ronaldo make him no do because no club for Europe go ever look him side again.

But Ronaldo still chook head go do the interview drag Manchester United leg come outside for public wey make the club disown am. But las las all things work out well for Cristiano Ronaldo because immediately after World Cup naim him sign that ogbonge Al Nassr contract wey make am the highest paid player ever in history.