This one na very worwor tory as we don dey hear now say 4 South African clubs don chop ban for life after the korokoro match fixing wey dem do wey make dem produce 41 own goals inside only 2 matches wey dem play against each other. The name of the clubs wey dey play for Division 4 inside Southie there na: Matiyasi FC, Shivulani Dangerous Tigers, Kotoko Happy Boys and Nsami Mighty Birds.
Apart from the 41 own goals, the South African clubs also score a total of 94 goals inside the 2 matches wey dem play. Na diswan make the league oga dem hala say, mbanunu, this water don pass garri, wey make dem quickly open register on top the 4 clubs head to begin investigate dem.
After investigation naim we find out say both Dangerous Tigers and Matiyasi FC dey drag who go top the league and gain automatic promotion into Division 3. Tigers use 3 points take dey top Matiyasi on top table so Matiyasi need to win dem last match well well to even get hope. Na so Matiyasi go arrange with Nsami Mighty Birds make dem open leg and collect wotorwotor. Na so Matiyasi take win with scoreline of 59-1.
But Matiyasi no know say when cunny man wan die anada cunny man dey on standby to bury am. When Dangerous Tigers wan play Happy Boys for dem final match, dem sef don run go arrange the tin so dat dem go keep Happy Boys happy and in return, Happy Boys go open leg for dem to collect wotorwotor. Na so Tigers take win dat match 33-1.
But the oga of the South African league dem begin ask whether na football those clubs play abi na basketball and when dem investigate finish, dem confirm say true-true na football dem play but the ojoro wey dey inside na generational ojoro wey South African football never witness before.
As a result, all the 4 clubs don chop life ban so dem can never operate as football club inside South Africa, whether na league o, non-league o, street football o, even monkey-post football, dem no fit organise to play again inside the country.
I wan see more black coaches for professional football – Yaya Toure
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Romelu Lukaku agents Roc Nation don drop am because him na bad market
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
FIFA nominate Victor Osimhen for the 2023 Best Player Award
FIFA don release dem 12 man shortlist of the official Best Player of the Year award and when we torchlight the list, we see am say our Naija Boy and Super Eagles hit man, Victor Osimhen stand gidigba inside the list.
Victor Osimhen carry Napoli win Serie A title last season, for the first time in more than 30 years. On top of that, the Naija boy become the first Naija man to win Serie A top scorer when him score 26 goals for the season.
E no end there as the 24 years old striker also overtake George Weah as the highest scoring African player for the history of Serie A when him score Napoli only goal wey dem take beat Fiorentina 1-0 back in May. That goal make am 47 goals for Osimhen while George Weah dey 46.
Over the weekend, Victor Osimhen score hat trick as Super Eagles destroy São Tomé and Principe 6-0 for the AFCON 2024 qualifiers wey shele for Uyo stadium.
Other players wey make the FIFA Best shortlist na Julian Alvarez of Argentina and Manchester City, Marcelo Brozovic of Croatia and Al-Nassr, Kevin De Bruyne of Belgium and Manchester City, Ilkay Gundogan of Germany and Barcelona, and Rodri of Spain and Manchester City.
Others na Erling Haaland of Norway and Manchester City, Khvicha Kvaratskhelia of Georgia and Napoli, Kylian Mbappe of France and PSG, Declan Rice of England and Arsenal, Bernardo Silva of Portugal and Manchester City, and Lionel Messi of Argentina and Inter Miami.
As e dey Go1 year ago
Thomas Tuchel don warn Graham Potter say nobody send your papa for Chelsea
As e dey Go12 months ago
Argentina World Cup celebration end in tears as 1 fan lose him life
As e dey Hot11 months ago
Na fake World Cup trophy Messi carry take break Instagram record
As e dey Go2 years ago
Transfer News: Bayern dey price Mane like market woman dey price onions
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Go9 months ago
We buy ticket for Super Eagles to give us joy, instead them increase our anger – fans
As e dey Hot1 year ago
Players and fans join hand beat referee to death for dashing player red card
As e dey Hot1 year ago
See how Romelu Lukaku beg Simone Inzaghi like prodigal son to let am return back to Inter Milan