For transfer news today, no be small sontin dey shele on top the transfer of Raphinha because we don dey hear now say Barca don ready to hijack the bobo transfer from Chelsea after we think say Chelsea don succeed to hijack am from dem London rivals, Arsenal.
Una remember say Arsenal been get confidence say dem go sign Raphinha even though dem no ready to bid anywhere near the 70 million pounds wey Leeds nak on top the guy head. But Chelsea show Arsenal say sugar daddy different from loverboy when dem enter the place with 60 million pound bid.
But just when Chelsea don dey happy say dem don finish work, Barca don enter the matter dey remind everybody say dem and Raphinha don agree personal terms since 4 months ago therefore na dem suppose marry the wife. Raphinha agent wey be Deco na former Barca and Chelsea player so you fit imagine him confusion. But we hear say the bobo dey currently negotiate with Barca and as you see dis Raphinha matter so, the tin don tie better wrapper.
Richarlison don agree to join Tottenham
We fit confirm give una say Everton forward, Richarlison don finally agree to join Tottenham on top long-term contract. E don tay wey Tottenham dey pursue the bobo and according to wetin we dey hear now, him don finally agree personal terms with the North-London club.
Richarlison don finally agree personal terms to take join Tottenham
Richarlison na Brazilian forward wey for play as striker or as winger. The bobo na one of Everton most consistent players and as dem dey struggle to survive relegation, Richarlison na among one of the players wey really hustle and show bite to make sure say Everton boat no capsize and sink enter relegation with 10 goals.
Tottenham really dey prepare demsef for UCL because the way dem just dey sign players now, if dem tell you say dem wan win treble next season, you no go too doubt dem. But right now, wetin remain na to agree transfer fee with Everton and dem go package Richarlison well, ship am straight to North London for dem.
Frenkie de Jong no ready to leave Barcelona
For the last transfer news today, we don dey hear say the only thing wey dey stop Frenkie De Jong from joining Manchester United now na say the bobo no sure say him don ready to leave Barcelona. According to wetin we hear, both Barca and United don agree transfer fee of 56.1 million pounds but when dem tell De Jong to begin negotiate personal terms, the bobo begin draw like ogbono wey dem no warm well.
Frenkie De Jong never ready to leave Barcelona join Man United
Manchester United coachie, oga Erik Ten Hag don swear say na Frenkie De Jong go be him major signing. Dis na player wey him don work with before and dem understand each other. But e be like say the player no get the same energy and as e be now, the bobo never ready to leave him comfort zone go try him luck for club wey no even dey go Champions League.