‘Arsenal no dey fear Man City, Liverpool or Chelsea’ – Bukayo Saka

After destroying Crystal Palace 4-1 for Emirates on Sunday, Arsenal winger, Bukayo Saka don come outside dey beat him chest like King Kong dey tell everybody say Arsenal no dey fear anybody for Premier League.

The Arsenal academy product cross 20 goal contributions (11 goals and 10 assists) for the first season of him career when him assist Gabriel Martinelli opener against Palace before scoring the second goal to win the Man of the Match award.

Arsenal open up 8 point lead on top Premier League table as them continue the hustle for them first title in nearly 20 years. With 10 matches to go, the Gunners get to play Chelsea for home, Newcastle away, Liverpool away and Manchester City away.

Arsenal dey feel on top of the world after opening 8 point lead on top EPL table

Na this one don make many people dey wonder whether Arsenal go fit survive all this heavyweight fixtures abi the elephant wey climb tree go finally crash down. But Bukayo Saka don dey tell everybody say that will never happen.

”Arsenal no dey fear anybody o. Walai talai, anybody wey we catch now go collect wotorwotor. Manchester City self feel am when them come here. If no be say we go loose guard, them for collect come. So e no matter who we jam, we no go look anybody face.”

Bukayo Saka wey be two-time Arsenal player of the year no be the only person for Arsenal wey dey high on confidence. Immediately after Arsenal lose to City naim Mikel Arteta yan say that loss no go stop Arsenal from winning the league.

“Manchester City no play pass us, we match them everywhere, but na those blunders wey we just take dey dash dem sara goals naim dem take punish us. But las las Arsenal go still win the Premier League.”