‘Karim Benzema suppose play World Cup, him injury no bad like that’- Benzema agent

Karim Benzema agent, oga Karim Djaziri don come outside dey tackle France coachie, oga Didier Deschamps and the entire France coaching team say them make big mistake by sending Karim Benzema home from World Cup due to injury.

Na just 3 days before France go play them opening match for Qatar against Australia when the Real Madrid striker collect thigh injury for training. And when France team doctor look am finish, him and the coach agree to send Benzema back home because the injury na 3 weeks injury and by then World Cup go don end.

But now, Karim Benzema agent don come outside dey shalaye say the bobo injury no bad reach like that and him suppose dey available for selection by the Round of 16.

Oga Djaziri yan say: Walai talai I no understand why oga Deschamps and oga team doctor send Benzema back home from World Cup because me I don go see 3 different specialist doctors and after them run x-ray, all of them confirm say Benzema injury no suppose reach one week.

Karim Benzema agent wan know who is fooling who because at this point na play them just dey play

The agent also confirm say just only 4 days after Benzema return, baba don dey run round the whole place. After another four days, the bobo play friendly match for Real Madrid.

So who is fooling who? Wetin make them lie say Benzema injury na 3 weeks when the bobo take only 8 days to enter pitch and play match for Real Madrid? Abi shay them dey whyne us ni?

France without Benzema play ball reach the final of the World Cup where them play 2-2 after 90 minutes and 3-3 after extra time before losing 4-2 on top penarity to Argentina.