Chelsea assistant coachie wan dump Chelsea go join Tuchel for Bayern

We don dey hear now say Chelsea assistant coachie, oga Anthony Barry don dump The Blues like slay queen dey dump man wey no get doings to go become assistant to Thomas Tuchel for Bayern Munich.

Oga Anthony Barry join Chelsea for 2020, under former coachie, oga Frank Lampard. But Barry survive the sack of Lampard and when Tuchel takeover as the new Chelsea coachie then, him carry Barry along and together, them win UCL.

But na for the start of this season naim Chelsea sack Tuchel as them coachie because of disagreement wey him get with the new owner, oga Todd Boehly. And once again, oga Barry survive the sacking of another coachie as him remain to become assistant to the new coachie, oga Graham Potter.

Anthony Barry don decide to decamp from Stamford Bridge

But as e be now, oga Barry don decide to finally sack himself just for the opportunity to finally reunite with him former boss, Thomas Tuchel wey Bayern Munich recently announce as them new coachie to replace oga Julian Nagelsmann.

According to the tory, oga Barry don submit transfer request say him wan leave Stamford Bridge. And right now, Chelsea dey hold am back say Bayern Munich must pay them compensation before them go allow the man go.