Ten Hag use Ronaldo as scapegoat that’s why him vex leave the club – Fernandes

As controversy still dey circulate about the kind anger and provocation wey Cristiano Ronaldo take leave Manchester United, him Portugal and former United teammate, Bruno Fernandes don come outside dey shalaye say na because Erik Ten Hag use Ronaldo take do scape goat.

Immediately Ten Hag take over as United coachie naim him carry the squad go preseason tour for Asia and Australia. Na for there him put him own sacred rules down say no matter how big you dey for the club, you must bow down or you bow out.

But Ronaldo no follow the squad go dat preseason so baba no get the memo. And according to Fernandes, na just when many of the players dey wonder whether dis Ten Hag rules go apply to big player like Ronaldo wey get big ego, Ten Hag no waste time begin use Ronaldo as scape goat:

“That Ten Hag na baba werey o. The guy no dey look anybody face. If him tell you to do something, either you do am or you chop bench. And na Ronaldo him take do scapegoat pass. In short na Ronaldo, Rashford and Sancho naim collect pass from the coach hand.”

Ronaldo don dey enjoy Arab money for Al-Nassr

Na the situation between Cristiano Ronaldo and Erik Ten Hag be dat wey make the former Real Madrid striker run go do interview begin blast the coach say him no respect am that’s why himsef no go respect am back.

Cristiano Ronaldo finally leave Manchester United after the interview and right now, the GOAT dey enjoy him football for Al-Nassr inside Saudi Arabia where him don become the highest-paid player ever in the history f football.