Wetin shele gan-gan
Ronaldo wan leave Manchester United for January because him don tire to be second choice
After only 7 matches into the season, we don dey hear now say Manchester United striker and football legend, Cristiano Ronaldo don dey plan him movement unto how him go take escape from Manchester United when transfer market open for January.
According to wetin we dey hear, the reason why Ronaldo wan japa dis time no be even to hustle UCL football again but because for the first time inside him career, the GOAT don become second abi third choice striker for club and dat life on the bench no fit am at all.
Una remember say last transfer window Cristiano Ronaldo try all him best to getat from Manchester United because him wan play UCL and not the Europa wey United dey carry am go. After UCL clubs like Bayern Munich, Chelsea and even Atletico Madrid reject am, the bobo kuku decide to manage United.
Many clubs reject Cristiano Ronaldo including Atletico wey dem fans even do one big banner against the GOAT
But even the United wey him dey, things don change drastically for am. Apart from say him dey play Europa League for the first time, him no be first choice or even second choice striker again because Erik Ten Hag prefer to use either Marcus Rashford or Anthony Martial for striking.
In fact the coachie believe say Rashford fit score up to 20 EPL goals dis season. To make matters worse for Cristiano Ronaldo, some United players dey complain say him no understand Ten Hag tactics because him no follow them go preseason. So whenever Ronaldo dey match and the team dey try play to instruction, Ronaldo go dey vex say make them give am the ball.
On top of dat, Manchester United don lose the 2 matches wey Ronaldo don start for them; the last one against Real Sociedad for Europa League and the EPL match against Brentford wey dem chop 4-0 kponking.
So as e be so, e sure for everybody say Cristiano Ronaldo bench go long well well and na wetin wan make the bobo use day time take begin find black goat wey loss and him don begin think of him January movement from now.