Neymar na the biggest flop in football history according to French media

After PSG lose them second match of the year when Rennes beat them 1-0 for Ligue 1 last Sunday, French media don come outside dey blast Neymar Junior say Walai talai sumobinlai, na that bobo be the biggest flop in the history of football.

Na for 2017 naim Neymar become the most expensive player in history when PSG count £198m take sign am from Barcelona straight Paris, even nak am jersey Number 10. Before joining PSG, Neymar one of the best players in the world and na only Cristiano Ronaldo and Lionel Messi get levels pass am.

For Barcelona apart from the local trophies, Neymar win Champions League, and FIFA Club World Cup. The Brazilian also finish 3rd two times for the Ballon d’Or award. So everybody believe say the guy na sure future World Best and PSG believe say na Neymar go finally carry PSG conquer Europe.

Since him land PSG, na to quarrel with him fellow players, fight with fans and referee and collect red card naim him don achieve

But now, nearly 6 years after joining PSG, na only local trophies Neymar don win wey don make many people begin wonder whether no be local champion this guy be. If na for skill, nobody get pass am. Shay na goals, baba sabi score goals. But yet, since him join PSG, e just be like say Nepa take light for him career.

Na this one don make French media come outside dey shake head say for player wey them buy with that kind big money yet him best highlight na to punch fans for face, to fight with referee for pitch, to dey collect red card like Ramos and to dey get injury when the club need am.