Ronaldinho son dey trial for Barcelona to start him career for Europe

Ronaldinho leave many legacies for football but one of the biggest legacy wey him fit leave na to give us another of himself. And we don dey hear now say him Ronaldinho son, Joao de Assis Moreira don dey train with Barcelona with the hope of landing professional contract.

Moreira wey dey 17 years old don dey train with Barca for the past 10 days and if things work out, him go join them youth academy wey be La Masia. The boy begin play academy football for him village club wey be Cruizero. But now him don decide to follow him papa footstep by invading Europe.

Ronaldinho himself na Barcelona legend and one of the best players to ever play football. After winning the 2002 World Cup with Brazil naim him join Barcelona where him carry them win 2 La Liga titles and 1 Champions League wey them beat Arsenal for the 2006 final.

Ronaldinho win the 2005 Ballon d’Or in 2005 as well as the FIFA World Player of the Year for 2004 and 2005. Na all this achievement naim Moreira go wan emulate but the question na whether him get the kind skills and talent wey him old man gather for leg.

Ronaldinho son, Moreira don already dey used to lifting trophy from early age

We hear say Ronaldinho son dey use both left and right leg like am. We also hear say him get some kind wucked wucked skills like him old man and him no dey shy to use am take destroy opponents. So if na whether him get the talent make una forget am, the thing dey body.

Na whether the junior Ronaldinho go fit use those skills take show all working naim remain to see now. Na Ronaldinho brother, Roberto de Assis be Moreira agent and right now him dey talk to Barcelona president, oga Joan Laporta unto the way forward for the boy.