Elephant on top tree: Supercomputer don predict say Arsenal go later lose Premier League title

As we don dey warm up dey prepare for the return of Premier League wey go restart today, one Ogbonge computer wey them dey call supercomputer don predict say Arsenal initial gra-gra go finally expire and them go jabo from the number 1 position wey them dey now.

Arsenal don start this season well by winning 12 out of the 14 EPL matches wey them don play so far. Them don lose and draw only once each and that fantastic result don help them accumulate 37 points, just 5 points above Manchester City wey dey 32 points.

To add on top, another supercomputer wey belong to Football Web Pages, been predict for September say Arsenal go win premier league with 86 points, 3 points above Manchester City wey go finish second. The computer predict say although Manchester City go win all them home matches, Arsenal go still overthrow them as EPL champions.

Just like elephant wey climb tree, everybody believe say Arsenal go finally crash down

But now, this other ogbonge computer wey belong to one betting company, BonusCodeBets don dey tell us to forget that last year prediction because the computer wey predict am never learn work finish. According to the new computer, the elephant go finally fall down from the tree as everybody expect am to.

Arsenal dey hustle for them first EPL title in 19 years but if we go believe the calculation wey the supercomputer calculate, The Gunners go labour in vain because by May when the league go end, Manchester City go don overtake them on top table. Mikel Arteta boys go later finish second.

Arsenal go hope to continue with them fine form when them restart them league campaign against West Ham today. Although them star striker, Gabriel Jesus no go dey available due to injury, then go still hope to overcome and continue where them stop before the World Cup break.