Cristiano Ronaldo don win Saudi League Footballer of the Month award

Football legend, Cristiano Ronaldo don win the Player of the Month award inside the Saudi Arabia Pro League for the month of February. The highest-paid player in history win the award after banging 8 goals and 2 assists for Al-Nassr in February alone.

Na for November 2022 naim Ronaldo leave Manchester United after disagreement with the club. And immediately after World Cup for December Ronaldo finally cross over to Saudi League after Al-Nassr nak am ogbonge contract worth £173 million every year.

But after arriving the club for January, the 5-time Ballon d’Or winner first no too see him period wey make even him Al-Nassr teammates begin complain say to win match don dey hard dem. But the floodgates finally open for February as Ororo begin show why him deserve that hooge salary.

Ronaldo no see him period at first for Al-Nassr

And now, after scoring 8 goals in one month alone, the league don nak Cristiano Ronaldo the Player of the Month Award. This one dey happen exactly one day after Lionel Messi win the FIFA Best Player of the Year award.

Messi carry him country, Argentina win the 2022 World Cup wey shele for Qatar. And just last week, the GOAT score him 700 club career goal wey make am join Ronaldo as the only 2 players in history to achieve am. The 2 GOAT share the pitch one last time for one club friendly last month.