Stadium of Pele: Cape Verde don rename their national stadium to honour Brazilian legend

The greatest player to ever play the game, Pele don die and them don bury am but the country of Cape Verde want make sure say the legacy of the icon continue forever and so then don kuku rename their national stadium in honour of the man.

As e be now, Cape Verde president, oga Ulisses Correira e Silva don announce say they national stadium wey the name na Estadio Nacional de Cabo Verde, don change name to become The Pele Stadium.

Edson Arantes de Nascimento wey everybody know as Pele, die at the age of 82 after suffering kidney and prostrate problem. The things worse sotay them get to put am for end of life care inside hospital until him finally logout on December 29.

The world football legend na one of the greatest and most popular players in the history of football. According to some record, na the bobo hold the highest number of career goals after scoring 1,281 goals inside 1,363 matches wey him play for him career wey last 21 years.

Pele also remain the only player in history wey don ever win 3 World Cup trophies. Na all this achievement make many people believe say na him be the greatest and na wetin don make Cape Verde decide to name their stadium to honour the man.

The Cape Verde national stadium wey dem don change to Pele Stadium

According to the Cape Verde president: the renaming of the stadium na to recognise Pele wey make the whole world great through football. So even though the legend don depart from this world, the stadium go always be reminder of how great the man been dey.

FIFA president don also call on countries around the world to rename at least one stadium after the Brazilian legend. But many people don reply am say that talk no make sense because e mean say more than 150 stadiums go dey bear the same name.