Ramadan wahala: Nantes coachie bench Algerian player for fasting on match day

As Muslims don start their Ramadan month, we don dey hear now say the coachie of Nantes inside French Ligue 1, Antoine Kombouare don bench one of him Muslim players because the boy no gree break him fast before match.

Oga Kombouare don put am as law say none of him players go carry empty stomach enter pitch no matter the circumstances. The Algerian player, Jaouen Hadjam join Nantes from Paris FC for January.

And before them last match with Reims naim the coachie ask everybody to chop and drink because no player go enter pitch without food. But 20 years old Hadjam no gree break him fast, insisting say as a Muslim, na haram to break fast before sundown.

Oga Kamboure drop the Algerian player for not breaking Ramadan fast

Na so the coach tell am say no food, no match and just like that, the coachie drop the guy from the squad. And now the coachie don dey shalaye say the reason why him bench the guy no be punishment but for him own safety.

”As Hadjam say him no wan chop, I respect him choice. And I also want make everybody respect my choice to drop am. No be punishment I punish am o. Na just to save am from injury or even collapse. Because I no stop am from fasting other days. Only on match day.“

The Ramadan season don dey bring many many kind reaction for the football world. During Liverpool match with Manchester City, Salah refuse to drink water wey them give am. Premier League also make special provision to allow players break their fast during match.