Italian referee wey refuse to shake woman hand go chop 1 match ban

We don dey hear now say one Italian referee wey snob the handshake of him woman assistant, Juan Luca Sacchi, don dey warm up to collect one match ban from officiating. Diswan happen just before the Serie A match between Sassuolo and Lecce on Friday.

Although dem never make am official, the tory na say the oga kpatakpata of the Italian referee dem no like wetin happen at all so him don recommend punishment.

But the matter fit no be as people dey reason am. According to the tory, na before the match start as players don line up dey wait for officials to come lead dem out, as oga Sacchi reach there him first shake Sassuolo captain Gian Marco Ferrari hand.

Then as the ref turn to shake Lecce captain, Gabriel Strefezza, hand wey him see na him assistant, Madam Francesca Di Monte hand. The ref first shock before avoiding the woman hand to shake Lecce skippo instead. From there the ref lead the teams enter pitch.

The snubbing pain the woman referee well well

While many people dey argue say as the Italian referee take shenk the woman hand no good and e look like misogyny, other people don dey defend the ref say the normal protocol at dat point na to shake the two skippo hand because the refs dem go don already welcome demsef when dem dey prepare for the match.

In other words, na the assistant ref, Madam Di Monte naim break protocol by bringing her hand and e no get anything to do weda she be woman or not. In fact the ref no even shake the other assistant hand wey dem for say him bone the woman shake the man so no case to answer there.

Anyway, we just dey wait to hear wetin the Italian Referee Association wey be AIA go talk on top the matter although we hear say the referee oga, Gianluca Rocchi dey para well well on top the matter.