Greenwood no go play for Manchester United this season even as court don clear am

Manchester United fans wey dey expect to see Mason Greenwood back for the team go likely wait till next season because we don dey hear now say United don open their own investigation into the matter to determine whether the guy dey fit to represent United again.

Na for January of 2022 naim police arrest Greenwood after video show online wey him dey kpokpo him girlfriend and threaten to sleep with her by force. Na this one make United suspend am indefinitely although them still dey pay am salary.

But after more than a year of investigating the matter and carry the matter go court, court don finally dismiss the case say them no fit continue because some witnesses no gree witness again and some other new information don turn up wey make them no fit continue.

Erik Ten Hag say him no wan put mouth for the matter

Na this one don make many Manchester United fans dey rejoice say maybe the guy go finally return to the club. But we don dey hear now say that Greenwood return go be very long thing because United wan do their own investigation and the thing fit take several months.

Court for don dismiss the case but then no declare Greenwood innocent or guilty. And for a big club like United, people wey get some kind criminal character no suppose dey represent them. In fact, United babes sef don come outside say them no want Mason Greenwood back for the club.