Arsenal final match day ticket dey sell for £25k as them hope to lift EPL that day

As Arsenal dey top table with the hope of lifting Premier League title by the end of the season, we don dey hear now say the club don nak the price tag of their final match for Emirates to £25,000 per ticket. This na because them expect to lift the trophy on that day.

Arsenal dey hustle to win their first Premier League title in nearly 20 years. When season start nobody believe say The Gunners go dey contest to win the title by this time of the season. Everybody believe say na Top 4 go be them highest aspiration.

But the Gunners prove everybody wrong from the start of the season with their beautiful but aggressive style of play, the hustling spirit of the players and the winning mentality of the team in general.

Their performance this season don help them beat every big club for the league so far, except Manchester City. Right now them dey 8 points clear on top of the table and nowadays them even dey celebrate each win with one big clock wey them take dey do countdown.

Arsenal shock many people this season

Na this belief say them don already win the Premier League title make them nak £25,000 on top the ticket price of them final match against Wolves wey them expect to lift the trophy. Normally, Arsenal ticket no dey sell pass £100.

But with 10 matches to go (11 for Manchester City), the race dey far from over. To make things even trickier, Arsenal still get to play Liverpool, Newcastle and their closest rival, Manchester City all away. Them go also play Chelsea wey don dey pick form for Emirates.