The Super Falcons of Naija don qualify for the quarter final of the Women Africa Cup of Nations wey dey shele inside Morocco after dem kpokpo Burundi babes 4-0 for the third and last match of dem Group C.
Nigeria wey get only 3 points before then after losing dem first match 2-1 against South Africa and winning the second one 2-0 against Botswana need to secure all the 3 points to push demsef enter the quarter final. And the babes no disappoint at all.
When Super Falcons dey celebrate dem 2-0 win against Botswana for dem previous WAFCON match
Na Rasheedat Ajibade start the dance when she convert from penarity spot to make am 1-0 after only 25 minutes. Three minutes later naim Peace Efih double the scores for the girls. Uchenna Kanu make sure say the first half end 3-0 with her first goal of the night and the competition.
Immediately second half start naim Kanu score her second goal to make am 4-0. She get opportunity to complete her hat trick but Burundi keeper no gree. The keeper later get injury and many people tink say the goals go begin flow like a river but Burundi girls hold on to make sure say e no pass dat 4-0.
As e be now, the Super Falcons finish the group with 6 points so dem carry second behind South Africa wey collect all the available 9 points after dem beat Botswana 1-0. Naija babes go okay dem quarter final match against Cameroon women on Thursday inside the city of Casablanca.