E pain me say I no score up to 5 goals against Leeds because I get target- Erling Haaland

After scoring 2 goals against Leeds last night to become the fastest player to score 20 Premier League goals in history, Manchester City big striker, Erling Haaland don come outside dey vex say him suppose score up to 5 goals for that particular match.

Manchester City beat Leeds 3-1 last night to reduce the gap between them and Arsenal on top Premier League table to just 5 points. And na Erling Haaland score 2 of those goals to record him 20th league goal after only 14 matches wey him don play.

But instead of to dey celebrate this ogbonge achievement, Haaland no too happy say him no score pass 2 goals for the match because according to am, him get target and unto that target, him suppose score up to 5 goals against Leeds.

Erling Haaland hot pass fire with 20 goals inside only 14 EPL matches for Manchester City

According to Haaland: as you see me so, I get target. And according to my target, na 5 goals I suppose score for that Leeds match. E pain me o, but nothing spoil because the most important thing na say we win and say we continue dey pursue Arsenal like thief for Oshodi and show them who be the best club for Premier League.

Manchester City go host Everton next on 31st December before visiting Stamford Bridge to play Chelsea on January 5. We no fit wait to see whether Erling Haaland go transfer the aggression on top them body wotorwotor as him continue the race to break the highest EPL goals in a season (34) set by Alan Shearer and Andy Cole.