Former Manchester United midfielder, Paul Pogba don come outside with provocation dey point hand inside the eyes of the club oga dem say walai talai the way dem take handle him contract situation for the club show say dem no rate am at all. Pogba say na so so lip service dem take dey claim say dem love am but when time reach to prove am by improving the salary inside the new contract wey dem dey give am, dem begin drag leg like man wey no get money go mistakenly enter Cubana.
Pogba make dis accusation for the new episode of the documentary wey Amazon dey run for him career as a footballer. Paul Pogba don finally leave Manchester City after several years of playing boju-boju wey him agent then, the late oga Mino Raiola go talk today say him wan comot from United. Tomorrow United go say him no dey go anywhere. Next tomorrow him brother go say him dey comot. Another day Pogba himsef go say him still gallant for United. Sotay even Pogba barber sef don chook mouth for the transfer matter.
And now wey him don finally leave the club dey ready to join Juventus, the bobo don come outside dey cast Manchester United with him full chest say dem no treat am like a player wey dem rate all. According to Paul Pogba:
”Me I just wan use this opportunity take show United say no be everytime dem go dey do anyhow and get away with am. Dem dey talk say dem want me to stay but to show me new contract na problem. Even when dem finally show me the contract, I go see am say nothing new dey inside. No assurance, no better money on top, the thing jus be like when you get girlfriend, you believe say the girlfriend love you so therefore no matter wetin you do, she go still take am like dat.”
But Pogba say it can never be him o. As far as he is concerned, na the same thing wey African Chyna sing naim him go tell United, so if you love somebody, show the pesin say you love am and you want am to stay. Him say United insist say dem want am to stay but dem no fit back am up with better money. And right now him mission na to show United say dem make big mistake.
Paul Pogba join United from Juventus for 2016 on top transfer fee of £89 million wey make am the most expensive player then. But Pogba form for United be like Nepa light as the thing just dey of and on and turnioniown. Na wetin make am no really play the kind ball wey fans expect am to play. And na wetin make am don leave United on top free transfer for the second time for him career be dat.
Guinea player wey accuse him coachie of stealing jersey wey Vinicius dash am go miss AFCON
Guinea midfielder, Morlaye Sylla name nor dey the list of players wey go play this CAF African Cup of Nations wey go take place for Ivory Coast next month after him accuse Guinea national team coach, Kabba Diawara of stealing jersey wey Vinicius Junior give am when them play friendly match with Brazil for June this year.
Wahala start when Sylla find out sey jersey wey him swap with Vini Jnr wey him carry enter dressing room dey miss. Him start dey hala sey how jersey wey him carry enter dressing room go just borrow leg like that. Him start dey search everywhere.
After him search everywhere, him sey him go search all the players for the dressing room sey nah them steal am. Then later, him start to dey accuse their team coach, Kabba Diawara, sey nah him steal the jersey.
Nah this one make the coach and Guinea FA sey him nor go play for them again unless him apologize. But Sylla nor gree apologize. Him sey him dey on him right as him expect Guinea FA to focus more on who thief him original jersey wey nor be okrika.
Guinea go start their AFCON on 15th January when them go play Cameroon before them play Gambia and then defending champions, Senegal.
I wan see more black coaches for professional football – Yaya Toure
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Romelu Lukaku agents Roc Nation don drop am because him na bad market
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
As e dey Go1 year ago
Thomas Tuchel don warn Graham Potter say nobody send your papa for Chelsea
As e dey Go1 year ago
Argentina World Cup celebration end in tears as 1 fan lose him life
As e dey Go2 years ago
Transfer News: Bayern dey price Mane like market woman dey price onions
As e dey Hot1 year ago
Na fake World Cup trophy Messi carry take break Instagram record
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Go11 months ago
We buy ticket for Super Eagles to give us joy, instead them increase our anger – fans
As e dey Hot2 years ago
Players and fans join hand beat referee to death for dashing player red card
Wetin shele gan-gan7 months ago
FIFA dey investigate Zambia coachie for rubbing him female players chest again