My people we don dey hear say Premier League don dey plan new rule to allow player wey dem don substitute due to concussion injury for head to enter the match again.

Una know say the new football rule allow for one extra change on top the new 5 changes in case a player suffer from head injury wey dem dey call concussion. But now, EPL want make dat concussion substitute be temporary substitution.

According to how the thing go work, if a player suffer concussion injury, them go substitute am put someone else first for the next 15 minutes.

Them go use that 15 minutes take check the player wey get the concussion well and if all is in order, them go remove the player wey replace am and allow am return back to the match.

As e be now, EPL dey argue say most times, coaches no dey want to lose them important players or scatter them plan so dem go likely ginger make the player wey suffer concussion continue.

Iran goalkeeper suffer head injury during them World Cup match against England but them no substitute am until 10 minutes later

A good example na Iran keeper, Alireza Beiranvand wey play on for 10 minutes during them first World Cup match with England after one wicked head clash wey be like where 2 danfo jam each other. The coach no gree remove am even though him no get himself again.

So Premier League wan make sure before any player fit continue, dem go don use their own doctors take check am for full 15 minutes and if him body still dey alright to continue, them go put am back for the match. If not, na from there straight to hospital.

But as e be now, FIFA no like the package. According to them, the arrangement wey dey down already make sense. Any player wey suffer head injury, dem go give him team extra substitution wey them dey call concussion substitute.

But no be FIFA go tel EPL what to do about rules. So right now EPL dey wait for IFAB to give them go ahead to start this parole. Once IFAB approve am, Premier League go begin use am starting from next season.

Former Chelsea coachie, oga Thomas Tuchel don come outside dey shake head and draw ear give the current Chelsea coachie, oga Graham Potter say: I see all the shalaye wey you dey explain after losing to Arsenal and Manchester City. Very nice. But the truth be say, nobody send your explanation for Chelsea.

Una remember say Chelsea play correct igbakugba wey dem take lose 1-0 to Arsenal for Stamford Bridge on Sunday. After that match naim oga Potter, during post-match press conference, admit say true-true, Arsenal better pass Chelsea and the two clubs no dey the same level.

Chelsea then play Manchester City for Carabao Cup last night inside Etihad and although them try this time, then still 2-0. This time, Graham Potter praise him players say them try well well and say him like the courage wey them show even though them lose.

Graham Potter don lose 3 out of him last 4 matches and Chelsea fans don dey doubt whether this man really fit carry them comot from Egypt so

Na diswan don make Thomas Tuchel come outside dey shake head say, all those things wey Potter dey talk so na the wrong answer wey Chelsea owners wan hear. According to the former PSG and Dortmund coachie: you don lose 3 out of your last 4 matches and you still dey speak big big grammar? Bros no be so o.

“Ordinarily, if you lose one match, you are not allowed to lose another match until when e don tay small. But when you lose 2 matches in a row and lose 3 out of 4 matches, for a club like Chelsea, my brother na your sack letter naim you dey play with so. Nobody go trust your process because your process dey carry them go where them no know.”

Oga Tuchel say it’s all well and good if Potter himself believe in him own process. If him dey come training on time and dey enforce discipline inside the team. But if all those things no dey bring result and na so so L-L-L naim full dem result, problem don dey be that.

As Barcelona don lose 3-1 to Real Madrid on Sunday for El Clasico wey push them enter second for La Liga table, Barcelona coachie, oga Xavi Hernandez don come outside with sorrow for him voice dey shalaye say after all the spending wey the club spend on top new players, if him no win trophy dis season, the club no go think am twice to sack am troway.

According to the coachie; I no kuku dey whyne myself about anything because after spending all that money to take sign players during transfer window, Barcelona presido himself don call me go corner and warn me say, if I no win trophy with this players, then heads go roll and the first head wey go comot na my own.

Una remember say Barcelona empty their bank account, break their kolo still sell plenty TV rights on top just to find money take sign ogbonge players give Xavi make him take perform. Players like Robert Lewandowski, Jules Kounde, Raphinha, Andreas Christensen and Franck Kessie, all of dem join the club this season.

Despite spending £150m this season, Barcelona still dey play igbakugba

Yet, despite spending nearly 150 million pounds on top this players head, then enter Champions League begin play like Europa League club, lose 2 and draw 1 of them 4 matches so far and right now, na Europa don dey sure for them. Even for La Liga wey dem been dey top, Real Madrid beat them on Sunday to push them down for table.

Na all this one don make Xavi Hernandez don use him teeth take count him tongue begin give himself advice and motivation. According to am, after Real Madrid beat Barca, all the messages wey him dey get for inbox be like say person die. But him say even that one no go stop am as him don ready to continue the work and make sure say Barca win trophy this season.

If you remember, Chelsea sack them former coachie, oga Thomas Tuchel after spending 271 million pounds for am on top transfer market. Them no even wait to see whether him fit win trophy or not because with that kind squad, you no even suppose dey lose match. Na to see now whether Xavi go win trophy abi Barcelona go serve am breakfast before season end.