As two former Manchester City players, Gabriel Jesus and Oleksandr Zinchenko don help Arsenal dey top Premier League table, 5 points on top their former club, their former coachie, Pep Guardiola don come outside dey yan say him no regret selling the two players to Arsenal at all.
Una remember say na before season start naim Arsenal coachie, oga Mikel Arteta go raid him former club sign both Jesus and Zinchenko from there wey two of them cost around £70m. And since the two players join Arsenal, them don dey carry the club like aboki wey dey carry yam.
Na this one don make many people dey wonder whether Pep Guardiola no regret why him sell those players especially as him boys dey even struggle to win matches nowadays. But the back to back Premier League winning coachie don dey clear them say him no regret at all.
According to the man: “Shay na because them dey win without me go make me dey regret selling them? No na. I no be bad bele. In fact na me even happy pass self say Jesus and Zinchenko dey do very well.”
Pep Guardiola say him love the two players even when them still dey Manchester City and na because condition don too make crayfish bend naim make am decide to sell the players go where them go dey happy. Him also talk say Zinchenko get many opportunities to leave City but him still decide to stay until Arsenal finally carry am.
Manchester City dey host Arsenal for FA Cup on Friday night and that go be the first time wey both Zinchenko and Jesus go play against their former club since them leave.
Romelu Lukaku agents Roc Nation don drop am because him na bad market
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
FIFA nominate Victor Osimhen for the 2023 Best Player Award
FIFA don release dem 12 man shortlist of the official Best Player of the Year award and when we torchlight the list, we see am say our Naija Boy and Super Eagles hit man, Victor Osimhen stand gidigba inside the list.
Victor Osimhen carry Napoli win Serie A title last season, for the first time in more than 30 years. On top of that, the Naija boy become the first Naija man to win Serie A top scorer when him score 26 goals for the season.
E no end there as the 24 years old striker also overtake George Weah as the highest scoring African player for the history of Serie A when him score Napoli only goal wey dem take beat Fiorentina 1-0 back in May. That goal make am 47 goals for Osimhen while George Weah dey 46.
Over the weekend, Victor Osimhen score hat trick as Super Eagles destroy São Tomé and Principe 6-0 for the AFCON 2024 qualifiers wey shele for Uyo stadium.
Other players wey make the FIFA Best shortlist na Julian Alvarez of Argentina and Manchester City, Marcelo Brozovic of Croatia and Al-Nassr, Kevin De Bruyne of Belgium and Manchester City, Ilkay Gundogan of Germany and Barcelona, and Rodri of Spain and Manchester City.
Others na Erling Haaland of Norway and Manchester City, Khvicha Kvaratskhelia of Georgia and Napoli, Kylian Mbappe of France and PSG, Declan Rice of England and Arsenal, Bernardo Silva of Portugal and Manchester City, and Lionel Messi of Argentina and Inter Miami.
Paul Pogba fit chop 2 years ban after failing drug test for Italy
Midfield general, Paul Pogba, don test positive for drug wey dem dey call testosterone. Italo media people dey sey the thing happen wen dem test am before their opening Serie A match against Udinese.
Pogba nor play the match but dem sey nor be the drug test wey him fail make am nor play the match. The World Cup winner wey return to Juventus from Manchester United last season don play only 32 minutes this season for him club.
Football people don sey Pogba problem don turn bicycle wey nor dey spoil. Since him leave Man U, injuries, fitness and other issues wey nor concern football don dey worry him football career. Even Juventus don dey wonder weda nah the real Pogba dem sign abi nah another person wey resemble am.
E nor va tey wey him just finish him blackmail family matter wey him brother, Mathias Pogba, bring come him doormot. As that one dey finish, another injury different from the one wey dey worry am before come. After that one, fitness issues come. Fitness issues never end, this drug test wahala don show like early mor-mor akara.
Testosterone nah energy booster drug wey dey boost body size and energy wey fit make player turn cheat for field. The National Anti-doping Tribunal go investigate the matter. If dem find am guilty, dem go nak am two years ban but if dem find out sey him use him two korokoro eyes do am, dem fit ban Pogba for four years.
If this one happen, Pogba don jump from frying pan enter fire be that because dead body nor suppose get accident.
As e dey Go11 months ago
Thomas Tuchel don warn Graham Potter say nobody send your papa for Chelsea
As e dey Hot9 months ago
Na fake World Cup trophy Messi carry take break Instagram record
As e dey Go9 months ago
Argentina World Cup celebration end in tears as 1 fan lose him life
As e dey Go1 year ago
Transfer News: Bayern dey price Mane like market woman dey price onions
As e dey Go6 months ago
We buy ticket for Super Eagles to give us joy, instead them increase our anger – fans
As e dey Hot1 year ago
Players and fans join hand beat referee to death for dashing player red card
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Hot1 year ago
‘Mbappe just use Real Madrid take dey catch cruise, him no ever plan to join dem’- PSG Presido