As e dey Hot
Graham Potter go remain as Chelsea coachie until next season
As Chelsea continue to dey play igbakugba wey don make dem fans begin give up on football, we don dey hear now say Chelsea oga dem, Todd Boehly and the rest, never ready to sack the coachie, oga Graham Potter anytime soon.
Season never go far when Chelsea owner, oga Todd Boehly sack Thomas Tuchel, replace am with Graham Potter wey be then Brighton coachie. The team first dey play well sotay Potter record 6 wins and 3 draws for him first 9 matches as Chelsea coachie.
But then injuries begin hit the squad sotay at a point dem get full squad of 11 players wey dey out with injury. Na then everything begin worwor wey dem begin lose match and chop draw soup all over the place.
But when January transfer window reach, Chelsea enter market spend more than £600m on top high quality players wey make fans begin believe say things go begin turn around. Yet, the results continue to poor sotay now Potter don record only 2 wins and 9 losses inside him last 15 matches.
Na diswan don make many fans believe say na the coachie be the problem and dem don dey wonder when Todd Boehly go finally decide say him cup don full and hit am with sledge hammer. But we don dey hear now say that no go happen this season.
According to the tory, Chelsea oga dem stand gidigba behind Graham Potter and dem no even dey reason the sacking matter. This na because dem believe very strongly say the man get wetin e takes to turn the situation around and make the club into powerhouse both for Premier League and Europe.
The oga dem also believe say the coachie na very honest and analytical man wey no dey put him own interest first which was why him decide to rest player like Reece James because report show say him fit sustain another injury.
So rather than risk James injury all because him need to win match, him still choose to rest am. Na all those kind behaviour dey make the oga dem believe say Potter really carry the welfare of the team and players above him own. Dem no wan sack da kind pesin.
As e dey Hot
Golden Eaglets don jabo from U17 AFCON after Burkina Faso beat dem 2-0
The Golden Eaglets of Nigeria don jabo from the 2023 U17 AFCON championship after Burkina Faso beat dem 2-1 for their quarter final match wey shele dis night inside Algeria there.
The match open from the beginning sotay the two sides dey get opportunity wey dem just dey squander anyhow.
But na calamity defending lead to Burkina Faso first goal when one Burkina winger collect the ball from the right, cancel 2 Naija defenders before bending the ball wey keeper save. But instead of defenders to clear the line, dem dey there dey drag leg until Aboubacar Camara put am inside net to make am 1-0.
The boys enter second half begin play under pressure and na another defensive error cause the second goal after one Burkina striker push ball inside 18 only for Naija defender to bring am down clumsily for penarity. The same Aboubacar Camara naim coolly convert the pk to make am 2-0.
But the boys no give up on demsef as dem begin dey pressure Burkina Faso until one ground crossing come in from the left wey one Naija striker flick enter Abubakar Abdullahi leg to tap in to empty net make am 2-1 and game on.
The boys try dem best to equalise but as usual, their inability to score goals become their biggest problem as Burkina Faso hold on to nak Nigeria comot for the 2023 AFCON U17 championship.
As e dey Hot
Golden Eaglets lose 1-0 to Morocco for dem second U17 Afcon match
Naija Under-17 national team, the Golden Eaglets don lose 1-0 for dem second Group B match inside the ongoing U17 AFCON completion wey dey shele inside Algeria.
Immediately match start wey Morocco pass the kick off naim dem carry the ball shoot one shot wey deflect inside net to make am own goal for Tochukwu Ogboji and 1-0 for Morocco.
But the Golden Eaglets take over from there begin press Morocco dey pressure dem sotay dem no even fit cross halfway line. But the problem be say whenever dem get opportunity dem dey miss am anyhow, even some clear chances wey dem just dey balloon anyhow.
The boys enter second half continue dey press Morocco while the Atlas Cubs continue dey defend like say dem life depend on am. But dat wan no stop the Naija boys from breaking dem down but the problem be say, even from close range all the Eaglets shot just dey go off target.
Una remember say Super Eagles skippo, Ahmed Musa promise this boys N500,000 for each goal wey dem score for dis competition. We no come know whether na dat promise dey affect dem wey dem go see big chances dey miss am upandan.
The Atlas Cubs secure all 3 points for the match and dem second clean sheet of the competition. As e be now, Morocco dey top Group B with 6 points while Naija dey second with 3 points.
The Golden Eaglets go play South Africa next on Saturday to decide whether dem go qualify directly from the group or qualify as best losers since na only 3 groups dey the competition.
As e dey Hot
Na against Man City I go know whether Arsenal players preeq still dey stand- Gallas
As Arsenal dey prepare to jam Manchester City for their win or die match wey go shele on Wednesday, former Arsenal defender, William Gallas don come outside dey yan say na for that match him go know whether Arsenal players get balls abi make dem sope otilo.
Arsenal don run through majority of the season on top of Premier League table sotay many fans don give up say make dem kuku leave the league for dem. One supercomputer sef don predict dem to win the whole thing.
But na now wey season dey round up naim Mikel Arteta boys come dey prove to be dem own biggest enemy. First dem squander 2 goals against Liverpool to draw 2-2. Then dem squander another 2 goals to draw 2-2 against West Ham.
But the one wey pain many fans pass na Southampton wey no get demsef come Emirates score 3 goals sotay Arsenal need late equalizer to draw the match 3-3 to make am hat trick of draws for the North London club.
Na diswan don make many people conclude say for dem to crumble when it matters most, Mikel Arteta and him boys no get wetin e take to win the league. But William Gallas believe say na on Wednesday we go find out whether true true the boys still get balls or not.
”Wetin I wan talk now, I know say some people no go like am but na the simple truth. Na on Wednesday against Manchester City I go know whether Arsenal players still get preeq and whether dem preeq still dey stand. I wan see which of the players go man up and which wan go be woman wrapper.”
Arsenal go face Manchester City on Wednesday night for Etihad. Many people believe say The Gunners don already squander their opportunity to win the league and on Wednesday night, Pep Guardiola go put the nail inside their coffin bury dem.
As e dey Hot5 months ago
Na fake World Cup trophy Messi carry take break Instagram record
As e dey Go7 months ago
Thomas Tuchel don warn Graham Potter say nobody send your papa for Chelsea
As e dey Go6 months ago
Argentina World Cup celebration end in tears as 1 fan lose him life
As e dey Go1 year ago
Transfer News: Bayern dey price Mane like market woman dey price onions
As e dey Hot12 months ago
Players and fans join hand beat referee to death for dashing player red card
As e dey Go2 months ago
We buy ticket for Super Eagles to give us joy, instead them increase our anger – fans
As e dey Hot5 months ago
Na Messi I want but na Ronaldo them give me – Al Nassr coachie
Wetin shele gan-gan7 months ago
‘If Ronaldo like make him scratch him blokos for public, who don big don big’ – Cristiano Ronaldo sister