Wetin shele gan-gan
FA don open file for Thomas Tuchel head for saying Anthony Taylor do ojoro
We don dey hear now say England FA don open file on top Chelsea coachie, oga Thomas Tuchel head unto some kind things wey him talk about the referee of Chelsea London derby match with Tottenham wey shele yesterday evening for Stamford Bridge.
Dat match tie wrapper sotay vawulence just dey fly helter-skelter. But inside the match wey end 2-2, many people including oga Tuchel no believe say any of Tottenham goals suppose be goal because Tottenham players play Chelsea players rough wey lead to those two goals.
Thomas Tuchel celebrate Chelsea second goal like craseman not knowing say for EPL, it is not over until it’s over
The tin pain Thomas Tuchel sotay by end of the match both him and Tottenham coachie, oga Antonio Conte don dey fight again for pitch wey make ref dash dem two red card. At dat time Tuchel think say the red card mean say him no go coach Chelsea for dem next match against Leeds but we find out say no be automatic suspension e be.
But even then, na dat provocation naim Thomas Tuchel take begin blast the ref, oga Anthony Taylor say: nna your ojoro too much abeg. In fact since I begin coach football, the kind ojoro wey you show me, I never see am before. Abeg as from today make you never officiate any Chelsea match again because we no fit dey play against 12 players for pitch including referee.
Na dat accusation of ojoro naim make FA don open file for Thomas Tuchel head so. According to the FA, dem go clean dem eyes and ears well take watch the video and listen to the audio well. Dem go also read the referee report well and if dem get any reason to believe say Tuchel talk pass him mouth, then him go get case to answer.
Premier League legend, Alan Shearer don come outside dey draw ear give Marcus Rashford take dey warn am say, if you no take time and begin behave yourself, you go waste this your talent and your career. This one na after Marcus Rashford miss Manchester United FA Cup 4-2 win against Newport on Sunday.
According to Manchester United manager, Erik Ten Hag, Rashford miss the match because him call in sick on the Friday before the match say him no go fit make am. But reports show say Rashford been go one night club on that Wednesday go over enjoy and na since after that club naim wetin dey do am begin do am. Ten Hag say na internal matter so him go deal with am internally.
But this one don make many people dey wonder say which kind internal issue go make player no even turn up on the day of match? Alan Shearer also recall sometime last season when the same Marcus Rashford chop punishment after him arrive late for meeting before one of them league matches.
Alan Shearer
Na this one don make Shearer wey be Premier all-time top scorer de shake head with pity say Rashford just want to waste him talent. According to the legendary striker:
Marcus Rashford get big talent o, but the problem now be say him just want to waste am. Because we see the boy when him serious last season na. But this season so far, I no know wetin be him problem, whether him get family problem abi him girlfriend dey give am problem, or maybe na just village people, we need to help this boy and find out wetin be the problem otherwise him go just waste him career for nothing.
Alan Shearer also advice Rashford to find better manager and surround himself with wise people wey go dey remind am say if him continue like this and him career end, then him go truly regret him life and him wasted talent.
For now we dey wait to see how Erik Ten Hag wan take resolve Marcus Rashford internal problems.
As AFCON 2023 don enter knockout stage wey them don pair Nigeria to play Cameroon for the Round of 16 so, Super Eagles legend, Segun Odegbami don come outside like KingKong dey beat him chest say this Cameroon match go too easy for Nigeria because we go beat them like small pikin.
This one dey come after the AFCON wey dey happen inside Ivory Coast progress from the group stage enter knockout stages. This talk confuse many people because even for the group stage self, the Super Eagles no really impress as them manage to score only three goals in their three matches still finish second for the group.
On top of that the ball wey them dey play no even dey sweet for eyes make we say na that one we take hold body self. But on top of all of this, Mathematical Segun believe say Nigeria wey no dey give fans joy go easily beat and eliminate five-time AFCON champions, Cameroon from the competition.
Segun Odegbami believe say Cameroon no be Nigeria mate
According to Odegbami:
Na this Cameroon wey everybody dey fear naim go be our easiest match for this AFCON. Because all those their gidigbo football wey them like to dey play no go work for this new stadium wey we dey go. The former stadium wey them been dey play rough like farmland. But na this smooth pitch naim we go catch them take show them correct pepper.
Segun Odegbami also talk say the Super Eagles dey improve for them game because after drawing their first match them win the last two. According to the legend, na progressive that so no shaking for that Round of 16 match.
Nigeria go play Cameroon for their Round of 16 match wey go happen on Saturday by 9pm Nigeria time. Wetin you think about that match? Abeg tell us for comment section.
This 2023 African Cup of Nations (AFCON 2023) don dey tie wrapper. And after the Black Stars of Ghana squander 2-0 lead to finally draw Mozambique 2-2 take jabo from the competition, their fans don use provocation take dey attack them say them no try at all.
One fan wey them ask whether there is room for improvement for the team despite their poor showing, the fan tell them hoo-ha say no room for improvement for team wey them don eliminate.
Which kind room for improvement be that when we don eliminate from the competition? Na people wey qualify go dey find room for improvement, as far as Ghana is concerned, time for improvement don pass because the worst don already happen.
Na Jordan Ayew convert 2 penalties, one for each half to put Ghana up 2-0 and give them wetin oyibo dey call a seemingly unassailable lead. Na after 90 minutes naim unassailable lead become assailable when Geny Catamo convert Mozambique own penalty to make am 2-1 inside 91 minutes before Reinildo Mandava complete the comeback with 94th minute goal.
Trezeguet and Mostafa help Egypt qualify
For the other match of the group, Mostafa Mohamed score 91st minute goal wey Egypt believe say them go take win 2-1 against Cape Verde only for Bryan Teixeira to score 99th minute equalizer for the Islanders to make am 2-2. But even the draw dey enough to qualify Egypt for the next round while Ghana carry their Ghana must go straight back to Kumasi.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans