England legend, Stuart Pearce don come outside dey talk say make everybody forget all those goals wey Erling Haaland just dey score upandan, Bukayo Saka still get performance pass am this season.
Saka na the hottest attacker wey Arsenal get right now with a total of 21 goal contributions for Premier League this season. The boy na one of the powerhouse of the team wey currently dey top table and dey hustle to win the title for the first time since 2004.
But Erling Haaland dey enjoy one of the best debut seasons wey any player don ever get in the history of the premier league. The Manchester City striker don already score 42 goals this season, including 28 for league with 11 matches to go.
But despite all those goals, oga Pearce still believe say the big striker never play wetin Saka play and according to am, na Saka deserve to win the Premier League Player of the Season. Stuart Pearce talk say:
“I know say Manchester City fans go talk say na Haaland be the best player this season but me I no gree. Na true say Haaland dey perform wonders o, but if we talk of who get impact pass, na Bukayo Saka. If not for Saka, Arsenal no go dey top league now. You no fit buy that kind impact for market.”
Premier League action go return this weekend. Arsenal wey get 7 point lead on top the table go try to extend am when them host Leeds for Emirates. City go try to reduce the gap when them host Liverpool for Etihad.
Victor Osimhen refuse to play penarity for Napoli after TikTok admin use am do yeye
My people e be like say Naija striker, Victor Osimhen don comot body from penarity matter for Napoli. Dis na because when Napoli win penarity kick for dem first goal during dem match with Udinese last night, when everybody dey expect Osimhen to carry tha ball play the thing as Napoli penarity taker, the 24 years old striker no even near there.
Na diswan make him Napoli teammate, Piotr ZielinskI carry the ball, convert the penarity to make am 1-0 for Napoli. Na Victor Osimhen score the second goal as the Serie A defending champions finally win the match 4-1.
Una remember say gbege burst during Napoli last match when dem draw 0-0 with Bologna. As the club dey hustle for goals during that match naim ref nak dem penarity. As dem penarity taker wey him be, Victor Osimhen step up only to play the ball off target.
Maybe Na diswan make coachie, Rudi Garcia substitute the Super Eagles striker from the match wey make Osimhen provoke hala for the coachie. Although the boy later apologise to the coachie and him teammates, da wan no stop Napoli TikTok people from using one short video take yab the boy.
Inside the video, dem show Osimhen dey beg for penarity and when dem give am the penarity, him troway am. The video contain all dis baby-baby voice wey dey pain well well if na you dem dey use am against. The TikTok video provoke many Naija people wey make dem vex go pressurize Napoli until dem delete the video.
The thing pain Victor Osimhen well well too wey make him agents release statement say dem ready to sue Napoli for dat kind nonsense behaviour. Although the bobo show professionalism to still turn up for dem match last night despite the provocation, him refuse to shake hands with some of him teammates. And now, the boy don comot body for anything penarity for Napoli.
Victor Osimhen apologise to Napoli coachie for him behaviour when dem sub am
Napoli striker, Victor Osimhen don knee down for ground dey apologise to him coachie and teammates for the worwor behaviour wey him behave when dem coachie, oga Rudi Garcia substitute am comot during dem 0-0 draw away for Bologna on Saturday.
That particular match tie wrapper well well even as Napoli manage 12 attempts but only 4 naim go on target. As the attack dey shoot off target naim coachie decide to remove Osimhen for the 86th minute even though him score one goal wey VAR disallow.
But the substitution no go well with Osimhen as the Super Eagles striker begin hala for the coachie say why him go remove for dis kind match wey tie wrapper so upon the big striker wey him be. But Victor Osimhen don come outside today dey apologised today dey apologise say him no mean any of those things wey him talk. According to am:
Make una forgive me for all those things wey I talk because na overheating make my blood just dey hot wey make me begin overreact. I no mean anything wey I talk then and na my competitive spirit make me talk those things as e dey pain me say we never fit score for dat match.
Napoli wey be Serie A defending champions no dey defend dem title well at all because out of five league matches so far dis season, Napoli don win two, draw two and lose one. This form naim carry dem balance for 7th place on top Serie A table with only 8 points.
Alrhough Napoli oga dem say dem still trust the coachie, oga Rudi Garcia to lead dem well, dem don give am warning to begin win matches and get results otherwise sack letter dey wait for am.
Ramsdale papa say Caragher na agbaya for calling him pikin hater
Arsenal goalkeeper, Aaron Ramsdale papa don tear shirt tear bra onto say Liverpool legend, Jamie Caragher, say him pikin nah olofofo wey dey pretend like sey him dey happy for others but inside their mind, dem dey pray sey the happiness nor last.
This one dey happen after camera capture Ramsdale wey dey for bench dey clap for Raya for one sweet save wey him make for the match between Arsenal and Tottenham wey end for 2-2 draw yesterday.
Carragher come go social media dey say Ramsdale nor actually dey happy for Raya and say the situation be like Oscar awards for people wey dey act film. Him say for the Oscar awards, you go see people wey nor win any award but nah so dem go dey smile and clap for the people wey win. But for their mind, dem dey vex. Caragher say nah exactly wetin Ramsdale dey do.
Nah this bad bele make Nick Ramsdale wey be Aaron Ramsdale papa sey Carragher nah disgrace and sey him nor get class like him pikin get. Him sey Carragher nah person wey him sense dey do stop and start.
As e be so, e don clear sey Carragher dey sabi find talk wey talk nor dey. Him pundit work don give am the liver to dey talk to anybody as him like. This Ramsdale matter don become wetin many football people don use know Carragher. We just hope sey dem nor go break him head one day.
As e dey Go11 months ago
Thomas Tuchel don warn Graham Potter say nobody send your papa for Chelsea
As e dey Hot9 months ago
Na fake World Cup trophy Messi carry take break Instagram record
As e dey Go9 months ago
Argentina World Cup celebration end in tears as 1 fan lose him life
As e dey Go1 year ago
Transfer News: Bayern dey price Mane like market woman dey price onions
As e dey Go6 months ago
We buy ticket for Super Eagles to give us joy, instead them increase our anger – fans
As e dey Hot1 year ago
Players and fans join hand beat referee to death for dashing player red card
Wetin shele gan-gan1 year ago
Ronaldo wan leave Manchester United for January because him don tire to be second choice
As e dey Hot1 year ago
‘Mbappe just use Real Madrid take dey catch cruise, him no ever plan to join dem’- PSG Presido