As e dey Hot
David Alaba say Rangnick na world class coach, na Manchester United no give am time
Real Madrid and Austria superstar defender, David Alaba don come outside dey shalaye say this Ralf Rangnick wey people just dey bad mouth anyhow, the guy na correct coachie wey sabi work well well. Alaba say Rangnick for shine for Manchester United if to say dem make am full landlord for the club instead of the caretaker work wey dem carry give am.
Una remember say United carry Rangnick come England all the way from Germany to come become dem new conductor driver after dem sack dem former coachie, oga Ole Gunnar Solksjaer for November 2021. When dem employ am, everybody dey hail am say na him be oga wey be master wey other ogbonge coachie dem like Klopp and Tuchel do boy-boy for him hand, therefore, him suppose do the conductor driver work well.
But instead of to drive the danfo reach bus stop, oga Rangnick drive am enter BRT lane sotay by the time the guy caretaker work finish for United, him don become the worst Manchester United coachie for EPL history with the lowest win percentage (37.9%) after only 10 wins inside 24 matches.
But Alaba don come outside dey praise Rangnick like delegates dey praise Buhari for APC Primaries say make nobody stress Rangnick because bad as him record be for United, na because dem no give am time to work.
“Na this same Rangnick show all working for Leipzig, for Salzburg and even for Hoffenheim and everybody see am say him sabi work. Therefore if e no work out for United, that means there’s problem somewhere and the way I see am, na because dem no give am enough time to show him talent. But e good like data sef because right now we dey enjoy the guy for Austria. The guy game plan always dey on point and the plan is simply make we choke the opponents until dem begin ask who dey breet? Then we go finish dem off. I don know Rangnick since I dey 18 years old and I fit tell you say the man na world-class coachie.
See also: England fans wey carry mkpurummiri enter Qatar World Cup fit chop death penalty
For him first match as Austria coachie, oga Ralf Rangnick carry dem beat Croatia 3-0 away win for dem UEFA Nations League match. But him chop him first L for him second match when Denmark nak Austria 1-0 for dem own backyard. But e be like Austria players get serious confidence for Rangnick and we pray say the bobo succeed there at least to remove small shame of Manchester from him face.
As e dey Go
Guinea player wey accuse him coachie of stealing jersey wey Vinicius dash am go miss AFCON
Guinea midfielder, Morlaye Sylla name nor dey the list of players wey go play this CAF African Cup of Nations wey go take place for Ivory Coast next month after him accuse Guinea national team coach, Kabba Diawara of stealing jersey wey Vinicius Junior give am when them play friendly match with Brazil for June this year.
Wahala start when Sylla find out sey jersey wey him swap with Vini Jnr wey him carry enter dressing room dey miss. Him start dey hala sey how jersey wey him carry enter dressing room go just borrow leg like that. Him start dey search everywhere.
Guinea football coachie
After him search everywhere, him sey him go search all the players for the dressing room sey nah them steal am. Then later, him start to dey accuse their team coach, Kabba Diawara, sey nah him steal the jersey.
Nah this one make the coach and Guinea FA sey him nor go play for them again unless him apologize. But Sylla nor gree apologize. Him sey him dey on him right as him expect Guinea FA to focus more on who thief him original jersey wey nor be okrika.
Guinea go start their AFCON on 15th January when them go play Cameroon before them play Gambia and then defending champions, Senegal.
Barcelona and Manchester City legend, Yaya Toure, don use microphone like hype man declare say more black coaches suppose dey professional football pass as e dey.
Yaya Toure wey leave Tottenham Hotspur U-16 for June this year go become assistant coach for Belgium with Standard Liege, don dey hala sey black coaches get everything wey any coach for world football need to succeed. According to am :
“My brother Kolo Toure nah the first and me don be second and e go continue like that. Black coaches go still become hot akara wey football clubs and national teams go dey rush. This nah because African coaches too get the ability to read and pass exams. In fact, nothing Guardiola and Mourinho fit do wey black coaches nor fit do”.
What Guardiola and Mourinho can do, we can do put jara
Yaya sey him go like become the third coach to win African Nations Cup as player and coach after Muhammad El Gohary (1959 as player and 1998 as coach) and Stephen Keshi (1994 as player and 2013 as coach). Him say the opportunity don come before to coach him country, Ivory Coast but say him reject am because him never ready then. But say him don ready now.
Yaya Toure dey speak to journalists onto the African Nations’ Cup draw wey go shele on Thursday for Ivory Coast. Yaya and him brother follow for the Ivory Coast team wey win African Nations Cup for Equatorial Guinea 2015. As him don dey advocate for black coaches so, football people dey sey make black coaches sef dem try dey show workings sake of sey better soap nor need advert.
Trouble don carry chair come balance for Romelu Lukaku house as e don clear sey Roc Nation wey belong to Jay Z don drop Lukaku from the list of players wey dem dey manage.
Roc Nation wey dey also look after players like Marcos Rashford, Kevin de Bruyne, Wilfred Zaha, Samuel Chukwueze, Tyrone Mings, Eric Bailly and many others don comot all the photo wey resemble Lukaku comot for their website. People wey know as e dey go for football don confirm sey Lukaku and Roc Nation nor wan roll again.
Romelu Lukaku join Jay Z sports management company for 2018 after him leave Mino Raiola company after the super agent death. Nah the same Roc Nation carry am come Manchester United from Everton. Nah still dem carry am come Chelsea from Inter Milan last year. Nah still dem toast Chelsea wey dem for gree loan am go Roma after Chelsea bin sey nah only sell dem wan sell am.
Lukaku matter don turn spiritual
This issue don dey make football people dey put 2 and 2 together because e never tay wey him betray Inter go discuss contract with Juventus for their back. E never tay too wey Juve fans dem carry fight go meet their club oga dem sey dem nor want Lukaku for their club. Then, Chelsea fans don play am tey-tey sey dem nor soro am onto how him insult their club for media under Thomas Tuchel.
All these issues put together don make Romelu Lukaku be like dog meat wey nobody wan buy. And as Roc Nation don decide to divorce am, we nor come know wetin happen gan-gan even as e clear sey Lukaku matter don turn spiritual.
-
As e dey Go1 year agoThomas Tuchel don warn Graham Potter say nobody send your papa for Chelsea
-
As e dey Go2 years agoTransfer News: Bayern dey price Mane like market woman dey price onions
-
As e dey Go1 year agoArgentina World Cup celebration end in tears as 1 fan lose him life
-
As e dey Hot1 year agoNa fake World Cup trophy Messi carry take break Instagram record
-
As e dey Go2 years agoTransfer news: Chelsea want Harry Maguire, Manchester United don sign Casemiro
-
Wetin shele gan-gan9 months agoFIFA dey investigate Zambia coachie for rubbing him female players chest again
-
Wetin shele gan-gan2 years agoRonaldo wan leave Manchester United for January because him don tire to be second choice
-
As e dey Go1 year agoWe buy ticket for Super Eagles to give us joy, instead them increase our anger – fans