Arsenal na the most indisciplined club for EPL this season, followed by Man United

We don dey hear now say na Arsenal dey top table for the most indisciplined club for Premier League this season. This na after we check finish see say na Mikel Arteta boys don face panel and pay the highest fine pass every other club for the league this season.

According to the matter, Arsenal don pay a total of £185,000 already this season as fines for the different times wey players don attack referee during match. This money cover the 4 different times wey FA open register for them head before nakking them different fines.

Arsenal chop fine during them 0-0 draw with Newcastle for Emirates, chop another one when them lose 3-1 to Man City for the same Emirates, them chop another one against Oxford FC for FA Cup, and finally against Leeds for EPL.

And with 10 matches still to go, there’s no guarantee say The Gunners no go chop more disciplinary fines as them continue dey fight aggressively for their first Premier League title in nearly 20 years. In fact them still fit collect again as them get case for over celebration against Bournemouth.

Na Manchester United dey carry second for the indisciplined table of agbero behavior

Na Manchester United dey carry second for the Premier League table of chopping fines because the Red Devils don chop total fine of £137,000 this season. Na Everton carry third with total fine of £115,000 this season.

Manchester City carry fourth with £75,000 fine this season, and na for that them match with Arsenal for Emirates naim them chop that fine wey put them for the list so.

A total of 15 Premier League clubs don chop fine this season. The only 5 clubs wey never collect fine na Southampton, Bournemouth, Brentford, Newcastle and Leicester.